بیرلشگن ملتلر تشکیلاتینینگ بالهلر جمغرمهسی (یونیسف) نیپالده سوو تاشقینیدن ضرر کۉرگن ۱۷ مینگدن آرتیق باله زودلیک بیلن روحي و اجتماعي یاردمگه محتاج اېکنینی معلوم قیلدی.
یونیسف بوگون (سهشنبه، ۲۴-سنبله) نشر قیلگن بیاناتیده ایتیشیچه، ینه ۵۴۱ کیشی باله هم خوف آستیده قالماقده. اولر همراهسیز قالگن یاکه سوو تاشقینلری عاقبتیده عایلهلریدن اجرهلیب قالگن بالهلردیر.
بیرلشگن ملتلر تشکیلاتی بالهلر جمغرمهسی سوو تاشقینلری بالهلرگه چوقور تأثیر کۉرسهتگنینی بیلدیردی. کۉپلب بالهلر یقینلرینینگ هلاک بۉلیشی، اویلر و مکتبلرنینگ ویران بۉلیشی، یشش جایلرینی ترک اېتیشگه مجبور بۉلیشی همده بېدرَک یۉقالگن عایله اعضالرینینگ تقدیری ناانیقلیگیگه گواه بۉلگن.
یونیسفنینگ نیپال بۉییچه وکیلی آلیس آکونگا: «کۉزگه کۉرینهدیگن ویرانهگرچیلیکلردن تشقری، بو سوو تاشقینلری بالهلر و عایلهلرده چوقور روحي جراحتلر قالدیردی»، – دېگن.
اونینگ قۉشیمچه قیلیشیچه، سوو تاشقینلری درس وقتیده یوز بېرگن و بالهلرنینگ خوفسیزلیک حسسینی بیر زومده یۉق قیلگن. کۉپلب بالهلر دهشتلی واقعهلرگه گواه بۉلگن و حاضر قۉرقوو، خواطر همده قیغو بیلن کورهشماقده. اَیریملری حتا باشیدن کېچیرگنلری حقیده گپیره آلمهیپتی.
یونیسف نمایندهسینینگ ایتیشیچه، انسانپرورلیک یاردمی و مهم آستقورمهلرنی تیکلش بیلن بیر قطارده، بالهلر صادر بۉلگن واقعهنی انگلب آلیش، خوفسیزلیک حسسینی قَیته تیکلش و ساغهییش جریانینی باشلشلری اوچون روحي و اجتماعي یاردمگه محتاج.
تریشولی شفاخانهسیده ایشلهیدیگن داکتر و یونیسفنینگ روحي سلامتلیک ساحهسیدهگی سابق یاشلر حمایهچیسی شیتانشو داکال هم سوو تاشقینیدن ضرر کۉرگن بالهلر و عایلهلرنینگ کۉزگه کۉرینمهیدیگن روحي جراحتلری جدّي تشویش اویغاتهیاتگنینی ایتگن.
اونینگ تأکیدلشیچه، فلاکت توگهگنیدن کېین هم قۉرقوو اوزاق وقت سهقلنیب قالیشی ممکن. بالهلر روحي سلامتلیککه عاید یاردم کۉرسهتیش جریانینینگ مرکزیده بۉلیشی و اوزاق مدتلی عاقبتلرنینگ آلدینی آلیش اوچون زودلیک بیلن دستلبکی روحی یاردم همده منتظم کمک آلیشی کېرهک.
یونیسف حکومت وکیللری و همکارلری بیلن همکارلیکده سوو تاشقینلریدن ضرر کۉرگن بالهلرنی حمایه قیلیش، عایلهلرنی ایزلش، بالهلرنی عایلهلری بیلن قَیته بیرلشتیریش همده اولرگه روحي و اجتماعي یاردم کۉرسهتیش بۉییچه ایش آلیب بارهیاتگنینی معلوم قیلدی.
تشکیلاتنینگ بیلدیریشیچه، حاضرگچه همراهسیز یاکه عایلهسیدن اجرهلگن 18 نفر باله اۉز عایلهلریگه قَیته بیرلشتیریلگن. ایکّله آته-آنهسیدن هم اَیریلگن بالهلر اوچون اېسه عایلهوي محیطده مقابل پرورش تشکیل اېتیش بۉییچه ضرور چارهلر کۉریلماقده.
بیرلشگن ملتلر تشکیلاتی بالهلر جمغرمهسی اساسي حرکتلنیش یۉللری، کۉچیریلگنلر جایلشگن حدودلر و باشقه مهم نقطهلرده بالهلرنی حمایه قیلیش بۉییچه جماعتچیلیک مانیتورینگ گروهلری تشکیل اېتیلگنینی بیلدیردی. اولر خوف آستیدهگی بالهلرنی انیقلش، تېگیشلی خدمتلرگه یۉنهلتیریش همده آدم سوداسی، استثمار و عایلهلرنینگ اجرهلیب قالیشینینگ آلدینی آلیش بیلن شغللنماقده.
یونیسف همکارلری بیلن بیرگهلیکده دستلبکی روحی یاردم و مصلحت خدمتلری آرقهلی روحي و اجتماعي کۉمکنی کېنگهیتیرهیاتگنینی هم معلوم قیلدی.
تشکیلاتگه کۉره، ۱۸ته «بالهلر اوچون دۉستانه مرکز»، جملهدن یونیسف کۉمهگیدهگی۱۳ ته مرکز بالهلر اۉیناشی، تعلیم آلیشی و ساغهییش جریانینی باشلشی اوچون خوفسیز محیط یرهتگن.
یونیسف بیاناتیده ایتیلیشیچه، اوشبو مرکزلرده وقتینچهلیک باشپناهلر و ضرر کۉرگن جماعهلرده فعالیت یوریتهیاتگن پسیکولوگلر، مصلحتچیلر و باشقه متخصصلر ترماغی کۉمهگیده خدمتلر کۉرسهتیلماقده.
یونیسف شونینگدېک، بالهلرنی حمایه قیلیش و روحي سلامتلیک خدمتلریگه نهادلرنی آشیریشگه چقیردی. تشکیلات سوو تاشقینلریدن ضرر کۉرگن بالهلر فلاکت عاقبتلرینی یېنگیب اۉتیش، تیکلنیش و حیاتینی قَیته یۉلگه قۉییش اوچون ضرور یاردمنی آلیشلری کېرهکلیگینی تأکیدلهدی.
تخمیناً ۲۰کون اوّل چین نینگ طبیعت حدودی بیلن نپال چېگرهسیدهگی حِمالهی تاغلری واديلریده موزلیکنینگ قولهب توشیشی آرتیدن کوچلی سوو تاشقینی یوز بېرگن و نپاللده کتّه تلفات و ویرانهگرچیلیکلرگه سبب بۉلگن.
رویترز ترقهتگن معلوماتلرگه کۉره، اوشبو سوو تاشقینی عاقبتیده ۱۳۰۰ کیشی هلاک بۉلگن، ۵۳۰۰ دن آرتیق کیشی اېسه بېدرَک یۉقالگن.
