تورکيه استخبارات ادارهسی باشلیغی ابراهیم کالین کابلگه سفری چاغیده طالبلرنینگ ایچکی ایشلر وزیری سِراج الدین حقّاني بیلن اوچرهشدی.
طالبلر ایچکی ایشلر وزیرلیگی بوگون کېچقورون (چهارشنبه، ۲۵-سنبله) اعلان قیلگن بیاناتیده ایتیلیشیچه، اوچرهشووده تامانلر «افغانستان و تورکيه اۉرتهسیدهگی تورلی ساحهلردهگی، خصوصاً، خوفسیزلیک، گیاهوند مادّهلرگه قرشی کورهش و اَیریم منطقوي مسألهلر بۉییچه علاقهلرنی کېنگهیتیریش» حقیده مذاکره قیلگن.
وزیرلیک حقّاني و تورکيه استخبارات باشلیغی اۉرتهسیدهگی مذاکرهلر تفصیلاتلرینی معلوم قیلمهگن.
بو تورکيه نینگ یوقاری مرتبهلی منصبدار شخصی نینگ کابلگه ایلک تشریفی حسابلنهدی. خبرلرگه کۉره، او کېچه کابلگه کېلگن و بوگون افغانستان پایتختینی ترک اېتگن.
خبرلرگه کۉره، تورکيه استخبارات باشلیغی بیلن بیر وقتده قظر ملي خوفسیزلیک کېنگشی رئیسی اۉرینباسری حمد خامس الکبیسی هم کابلگه تشریف بویورگن.
مذکور خوفسیزلیک منصبدارلرینینگ کابلگه تشریفیدن کۉزلنگن مقصد معلوم قیلینمهگن.
طالبلر حکومتیدهگی یوقاری مرتبهلی خوفسیزلیک رسميسی بیبیسیگه بېرگن صحبتیده مذاکرهلرنینگ اساسي موضوعسی خوفسیزلیک ساحهسیدهگی همکارلیک همده افغانستان و پاکستانگه عاید مسألهلر بۉلگنینی ایتگن.
اسمینی آشکار قیلیشنی ایستهمهگن اوشبو رسميگه کۉره، تورکيه استخبارات باشلیغی و اونگه همراهلیک قیلگن هیئت باش وزیر اۉرینباسری وظیفهسینی بجرووچی عبدالغنی برادر، مدافعه وزیری وظیفهسینی بجرووچی محمد یعقوب مجاهد، ایچکی ایشلر وزیری وظیفهسینی بجرووچی سراجالدین حقّاني همده طالبلر استخبارات باشلیغی عبدالحق واثق بیلن هم اوچرهشیب، مذاکرهلر اۉتکزگن.
تورکيه قطر بیلن بیرگه طالبان و پاکستان حکومتی اۉرتهسیده واسطهچیلیک قیلهیاتگن دولتلردن بیری صفتیده تنیلگن. انقره طالبلر بیلن یقین علاقهلرگه اېگه، شو بیلن بیرگه، اوشبو گروهگه مخالف اَیریم شخصلرنی هم اۉز حدودیده قبول قیلیب کېلهدی.
