بیرلشگن ملتلر تشکیلاتینینگ خلق ارا عفو تشکیلاتینینگ جَنوبي آسیا بۉییچه منطقوي وکالتخانهسی افغانستاندهگی اَیریم قیزلر تعلیمنی دوام اېتتیریش اوچون خارجگه قاچهیاتگنینی معلوم قیلدی.
اوشبو تشکیلات بوگون (پنجشنبه، ۲۶-سمبله) قیزلر تعلیمینینگ تعقیقلنگنیگه بېش ییل تۉلیشی مناسبتی بیلن ایکسدهگی پیامیده افغانستاندهگی کۉپلب قیزلر تعلیم آلیشنی دوام اېتتیریش اوچون قرشیلیک کۉرسهتهیاتگنینی ایتدی.
خلق ارا عفو تشکیلاتی شوندهی دېگن: «بوگون طالبلر قیزلر تعلیمینی تعقیقلهگنیگه بېش ییل تۉلدی؛ میلیونلب قیزلرنینگ تعلیم آلیش حقوقیدن محروم اېتیلگنیگه بېش ییل، آرزو و امیدلرنینگ برباد بۉلگنیگه بېش ییل و عدالتسیزلیک حکم سورهیاتگنیگه بېش ییل بۉلدی.»
تشکیلاتنینگ ایتیشیچه، اوشبو وضعیت دوام اېتهیاتگنیگه بېش ییل بۉلگنیگه قرهمهی، «افغانستاندهگی کۉپلب قیزلر هنوز ناراضیلیک نمایشلری اۉتکزیش، یشیرین آنلاین مکتبلرده تعلیم آلیش یاکه اۉقیشنی دوام اېتتیریش اوچون خارجگه قاچیش آرقهلی اۉز قرشیلیگینی دوام اېتتیرماقده».
خلق ارا عفو تشکیلاتی افغانستان قیزلرینی قۉللب-قوّتلشگه چقیریب، خلق ارا همجعميت طالبلرنی قیزلر مکتبلرینی زودلیک بیلن قَیته آچیشگه مجبورلشی کېرهکلیگینی بیلدیردی.
بېش ییل اوّل عیناً شو کونی، ۱۴۰۰-ییل ۲۶-سمبلهده، طالبلر افغانستان اوستیدن نظارتنی قۉلگه آلگنیگه اتیگی بیر آی بۉلگن پیتده، اوشبو گروه فرمان چیقریب، قیزلرنینگ اۉرته و یوقاری صنفلرده تعلیم آلیشلرینی تعقیقلهگن و فقط آلتینچی صنفدن پست بۉلگن قیزلرنی مکتبگه چقیرگن.
اۉشه پیتده آلتینچی صنفدن یوقاری بۉلگن قیزلرنینگ تعلیم آلیشی «ایکّینچی فرمانگچه» قالدیریلگن اېدی، بیراق بو قرار تخمیناً آلتی آی اۉتیب طالبلرنینگ رسمي سیاستیگه ایلندی.
شو دورده قیزلر اوچون بیر نېچته آنلاین مکتب تشکیل اېتیلدی، شونینگدېک، افغانستانلیک قیزلرنینگ بیر قطار خلق ارا بیلیم یورتلرده آنلاین تعلیم آلیشلری اوچون امکانیت یرهتیلدی.
انیق آمار موجود بۉلمهسه-ده، خبرلرگه کۉره، کۉپلب عایلهلر قیزلرینینگ تعلیمینی دوام اېتتیریشلری اوچون قۉشنی دولتلرگه یاکه اروپا مملکتلریگه کۉچیب کېتگن.
