بیرلشگن ملتلر تشکیلاتینینگ افغانستان بۉییچه انسان حقوقلری مخصوص گزارشگلری ریچادر بنت، طالبلر تامانیدن بو مملکت قیزلرینی تعلیم آلیشدن محروم اېتیلیشینی انسانیتگه قرشی احتمالي جنایت دېب اتهدی.
او بوگون (پنجشنبه، ۲۶ سمبله) قیزلرنینگ تعلیمدن محروم اېتیلگنیگه بېش ییل تۉلیشی مناسبتی بیلن یۉلهگن پیامیده افغانستان هنوزگچه اهالیسینینگ یرمینی مکتبگه باریش و اۉقیشنی دوام اېتتیریشدن محروم قیلهیاتگن یگانه دولت اېکنینی ایتدی.
بنتنینگ قۉشیمچه قیلیشیچه، بو محروملیک نهفقط قیزلرگه تأثیر قیلهدی، بلکه مملکتنینگ بوگونی و کېلهجگیگه هم کتّه تأثیر کۉرسهتهدی.
او شونینگدېک: «بو حالت نهفقط قبول قیلیب بۉلمهیدیگن درجه-ده، بلکه غضبلنتیرووچی حالتدیر و احتمال انسانیتگه قرشی جنایت صفتیده بهالنیشی ممکن»، دېدی.
بیرلشگن ملتلر تشکیلاتی مخصوص گزارشگری قیزلر اوچون مکتبلرنی قَیته آچیشگه چقیردی.
او، شونینگدېک، دولتلرگه عیاللر و قیزلرنی تیزیملی روشده تعقیب و تضییق آستیگه قۉیهدیگن حکومتنی قانونيلشتیریشگه یۉل قۉییب بۉلمسلیگینی ایتدی.
طالبلر حاکمیتگه قَیتگنیدن سۉنگ، آلتینچی صنفدن یوقاری صنفلرده اۉقيدیگن قیزلر مکتب و بیلیم یورتلر تعلیمیدن محروم قیلیندی. بو گروه دستلب قیزلر مکتبلری «ایکّینچی بویروققهچه» توختهتیلگنینی اعلان قیلگن اېدی، بیراق بېش ییل اۉتگنیگه قرهمهی، بوندهی بویروقدن درَک یۉق. باشقه تاماندن، بو گروهنینگ عیاللر و قیزلرگه قرشی چېکلاولری سۉنگگی بېش ییل دوامیده تاباره کوچهییب بارماقده.
