طالبلرنینگ عدلیه وزیرلیگی سۉنگگی تۉرت ییل دوامیده ۱۴ ولایتده ۴۹ ته تورر جای شهرچهسی تۉلیق یاکه قسماً «دولت ملکی» صفتیده بېلگیلنگنینی معلوم قیلدی.
اوشبو وزیرلیک بوگون (پنجشنبه، ۲۶ سمبله) بیاناتیده یېرلرنی باسیب آلیشنینگ آلدینی آلیش و باسیب آلینگن یېرلرنی قَیتریش کمیسیونی فعالیتینی باشلهگنیدن بویان برچه تورر جای شهرچهلرینی تېکشیرگنینی، حاضرگچه ۴۹ ته شهرچه بۉییچه قرار قبول قیلینگنینی بیلدیردی.
طالبلر عدلیه وزیرلیگیگه کۉره، فقط کابلنینگ اۉزیده ۱۵ ته شهرچه تۉلیق یاکه قسماً «دولت ملکی» صفتیده بېلگیلنگن. اولر قطاریگه میرویس شهرچهسی نینگ قریب ۱۱۰ جېریب، سردار داوودخان شهرچهسی نینگ ۵۵۴ جېریب، سناتور جنت گل شهرچهسی نینگ ۳۷ مینگ جېریبدن آرتیق، امید سبز شهرچهسی نینگ ۱۵۰۷ جېریب، غعیبي بابا شهرچهسی نینگ ۱۰۴۲جریبدن آرتیق و عمر گُلستان شهرچهسی نینگ قریب ۱۱جېریب یېری کیرهدی.
بلخ ولایتیده ۱۰ ته شهرچه، جملهدن دیپلوماتیک، بهرآب، خالد ابن ولید، امیر علیشېر نوايی، زینبيه، امرخ، مایارمینه، شهید ذبیحالله، غضنفرنینگ برادرلری شهرچهلری و خودی دولت لایحهسی «دولت ملکی» صفتیده بېلگیلنگن.
ننگرهارده یېتّیته شهرچه، جملهدن سیاهسنگ، قاسم ةباد ملنگجان، شمشاد مینه، دولتزي، حاجی قادر، سید اسحاق گیلاني و نجمالدین آخوندزاده شهرچهلری تۉلیق یاکه قسماً مصادره قیلینگن.
میدان وردهک ولایتیده شهرنو شهرچهسی نینگ قریب ۱۴۲۸جریب یېری، غزنی ولایتیده اېسه حکیم سنایی شهرچهسی نینگ ۱۲۹۳ جریب، نوآباد شهرچهسی نینگ ۱۸۴۳ جریب و سلطان محمود غزنوي شهرچهسی نینگ ۹۱۵ جریب یېری «دولت ملکی» صفتیده مصادره قیلینگن.
طالبلر عدلیه وزیرلیگی یېرلرنی باسیب آلیشنینگ آلدینی آلیش کمیسیونی تامانیدن تېکشیریلگن ینه ۱۳ ته شهرچه باشقه تۉقّیز ولایتده جایلشگنینی بیلدیردی.
وزیرلیک ینه اۉنلب شهرچهلرگه عاید ایش و حجتلرنی کۉریب چیقهیاتگنینی همده اولر بۉییچه تېز آرهده قرار قبول قیلینیشینی معلوم قیلدی.
طالبلر عدلیه وزیرلیگینینگ یېرلرنی باسیب آلیشنینگ آلدینی آلیش و باسیب آلینگن یېرلرنی قَیتریش کمیسیونی فعالیتی تنقیدلرگه اوچرهماقده. تنقیدچیلر اوشبو کمیسیون قرارلرینی عدالتلی دېب حسابلهمهیدی.
مذکور کمیسیون اَیریم تورر جای شهرچهلرینی بۉشهتیش حقیده بویروق بېرگن. اوشبو شهرچهلر اهالیسی اېسه اۉزلریده ملک حجتلری بارلیگینی اَیتماقده. بو بویروقلر یوزلب عایلهلرنی باشپناهسیز قالیش و کۉچیشگه مجبور بۉلیش خوفیگه دچار قیلگن.
