رویترز خبرگزارلیگینینگ خبر بېریشیچه، چین تهراندن یمندهگی حوثيلرنی جلولشگه یاردم بېریشنی یشیرینچه سۉرهگن.
بو حقده مذکور مسألهدن خبردار بۉلگن اوچ نفر ایرانلیک منبع رویترزگه معلوم قیلگن.
چیننینگ بو طلبی سعوديه عربستانی حوثيلرنینگ کېنگ کۉلملی حربي عملیاتلریدن سۉنگ پکیندن یاردم سۉرهگنیدن کېین ایلگری سوریلگن.
منبعلرگه کۉره، حوثيلر قیزیل دېنگیز ساحللری و باب المندب بۉغازی اطرافیده تېز سرعتده ایلگریلگچ، ریاض چیندن یاردم سۉرهگن. بو حرکتلر سعوديه عربستانینینگ نفت اېکسپورتی و اوشبو حدوددهگی دېنگیز قتناوینی ینه-ده کتّه خوف آستیده قالدیرگن.
چین آچیق روشده وزمینلیک، ملاقات و خوفسیز کېمهچیلیکنی قَیته تیکلشگه چقیرگن. بیراق منبعلرگه کۉره، پکیننینگ تهرانگه یوبارگن یشیرین خبری مملکتنینگ عامهوي بیاناتلریدن کۉره کېنگراق مضمونگه اېگه بۉلگن.
منبعلرنینگ ایتیشیچه، پکین ایراندن حوثيلر اوستیدهگی تأثیریدن فایدهلنیب، دنیانینگ ایکّینچی ییریک اقتصادی بۉلگن چین باغلیق بۉلگن انرژی تشیش یۉللریده ماجرانینگ ینه-ده کېنگهییشیگه یۉل قۉیمسلیکنی سۉرهماقده.
ملاقاتلردن خبردار بۉلگن و انونیملیک شرطی بیلن گپیرگن منبعلر اوشبو خبرنینگ قندهی یېتکزیلگنی حقیده تفصیلات بېرمهگن.
اولر، شونینگدېک، بو خبر ایران تشقی ایشلر وزیری عباس عراقچینینگ چهارشنبه کونی چینگه قیلگن تشریفی چاغیده یېتکزیلگن یاکه یېتکزیلمهگنینی ایتمهگن.
چین تشقی ایشلر وزیرلیگی بیاناتیده وانگ یی ایران تشقی ایشلر وزیری بیلن منطقوي مسألهلر، جملهدن، ایران و امریکا اوروشی همده هرمز بۉغازی حقیده مذاکره اۉتکزگنی ایتیلگن.
چین تشقی ایشلر وزیری وانگ یی ایران و امریکانی منطقن حرکت قیلیشگه و اسلام آباد کیلیشوویگه قَیتیشگه چقیرگن.
او، شونینگدېک، منطقهدهگی ترنگلیک نینگ یمن و قیزیل دېنگیزگه یاییلیشیدن آگاهلنتیریب، برچه تامانلرنی وضعیتنی ینه-ده مرکّبلشتیرهدیگن حرکتلردن تيیلیشگه همده مسألهلرنی ملاقات و مذاکرهلر آرقهلی حل قیلیشگه چقیرگن.
