پاکستان یېتکرمهلرینینگ خبر بېریشیچه، خیبر-پختونخوا ایالتینینگ کوهات اولسواللیگیده مسجد یقینیده پارتلش صادر بۉلیشی عاقبتیده کمیده ۱۵ کیشی هلاک بۉلگن، ۵۰ دن آرتیق کیشی یرهلنگن.
جیونیوز خبریگه کۉره، پولیس پارتلش بوگون (جمعه، ۲۷-سنبله) کوهات اولسواللیگیدهگی «پولیس لاینز» منطقهسیده جمعه نمازی اۉقیلهیاتگن وقتده صادر بۉلگنینی معلوم قیلگن.
اوشبو نشر خبریگه کۉره، قوتقروو خدمتی مسووللری پارتلش مسجدنینگ تشقی قِسمینی جدّي شکستلهگنی و دېوارلردن بیرینینگ قولهشیگه سبب بۉلگنینی ایتگن.
اولر پارتلش جاییده قوتقروو ایشلری دوام اېتهیاتگنینی و قربانلر سانی آشیشی ممکنلیگینی بیلدیرگن.
خیبر پختونخوا پولیسی باش تیکشیروچیسی ذوالفقارحمیدنینگ ایتیشیچه، پارتلاوچی مادّهلر آرتیلگن موتر «پولیس لاینز»نینگ اېسکی دروازهسیگه اوریلگن و شوندن سۉنگ پارتلهگن.
او جیونیوزگه بېرگن صحبتیده: «موتر دروازهگه اوریلدی و شوندن کېین پارتلهدی. شو پیتده آتیشمه هم صادر بۉلدی»، – دېگن.
اونینگ ایتیشیچه، پارتلش خودکوشلیک هجومی بۉلگن. شونینگدېک، اوندن کېینگی آتیشمه وقتیده پولیسنینگ مخصوص بۉلیمی بناسیده ینه بیر خودکوشلیک پارتلشی صادر بۉلگن.
حاضرگچه هېچ بیر شخص یاکه گروه اوشبو پارتلش اوچون جوابگرلیکنی اۉز ذمّهسیگه آلمهگن.
پاکستانده طالبلر افغانستانده حاکمیتنی قَیته اېگهلهگنیدن سۉنگ خوفسیزلیک بیلن باغلیق معمالر کوچهیگن. خیبر پختونخوا اېسه مملکتدهگی اېنگ بېقرار ایالتگه ایلنگن.
پاکستان رسميلری اوشبو هجوملرنینگ اکثریتیگه «پاکستان طالبان حرکتی» (تیتیپی)نی مسوول دېب بیلهدی و مذکور گروه اۉز هجوملرینی افغانستان توپراغیدن فایدهلنیب عملگه آشیرهیاتگنینی دعوا قیلهدی.
