افغانستان برشنا شرکتی باشلیغی عبدالحق همکار تورکمنستان برق انرژیسینی افغانستان و پاکستانگه ۵۰۰ کیلوالت کوچلنیش بیلن اوزهتیش لایحهسی (تاپی) باشلیغی مراد آرتیکوف بیلن اوشبو لایحهنی عملگه آشیریش جریانینی تېزلشتیریش مسألهسینی بحث قیلدی.
برشنا شرکتی بوگون (شنبه، ۲۸-سنبله) بیانات نشر قیلیب، «تاپ» لایحهسی باشلیغی باشچیلیگیدهگی هیئت کابلگه تشریف بویورگنینی معلوم قیلدی.
بیاناتده ایتیلیشیچه، مراد آرتیکوف عبدالحق همکار بیلن اوچرهشوو چاغیده ۵۰۰ کیلوالتلیک برق اوزهتیش لایحهسینی یکونلش بارهسیدهگی ایشلرنینگ رواجیدن و اولرنی تېزلشتیریشگه بۉلگن قطعیتدن ممنونلیگینی بیلدیرگن.
تامانلر هرات ولایتیدهگی «نورالجهاد» برق استیشنیده قالگن ایشلرنی یکونلش، بادغیس ولایتینینگ «بالامرغاب» اولسوالیگی برق انرژیسی بیلن تأمینلش همده «تاپ» لایحهسی نینگ اجرا تفصیلاتلرینی محاکمه قیلگن.
مراد آرتیکوف تورکمنستان و «تاپ» لایحهسی رهبریتی هراتدهگی «نورالجهاد» استیشنیده توگللنمهگن ایشلرنی یکونلش، بادغیسدهگی «بالامرغاب» اولسواللیگی برق انرژیسی بیلن تأمینلش و باشقه تېگیشلی رواجلنیش لایحهلرینی عملگه آشیریش بارهسیدهگی همکارلیکنی دوام اېتتیریشگه صادق اېکنینی بیلدیرگن.
منطقهدهگی اَیریم ییریک لایحهلر، جملهدن، تورکمنستاندن افغانستان و پاکستانگه برق انرژیسی اوزهتیش لایحهسی (تاپ) همده تورکمنستاندن افغانستان آرقهلی پاکستان و هندستانگه گاز یېتکزیب بېریش قوووری (تاپی) جمهوریت حکومتی دوریده باشلنگن، بیراق طالبلر حاکمیتگه کېلگنیدن کېین توختهب قالگن.
سۉنگگی ایکّی ییل ایچیده اوشبو لایحهلر بۉییچه ایشلر ینه باشلنگن، بیراق اولرنی عملگه آشیریش حلی هم دستلبکی باسقیچده قالماقده.
