پاکستان پولیسی رسميلری خیبر-پختونخوا ایالتینینگ کوهات اولسواللیگیدهگی پولیس مجموعهسیگه اویوشتیریلگن پارتلش و قوراللی هجوم عاقبتیده هلاک بۉلگنلر سانی ۳۱ نفرگه یېتگنینی تصدیقلهدی.
پاکستان پولیسینینگ یوقاری مرتبهلی رسميسی بوگون، شنبه، ۲۸ سنبلهده فرانسه خبرگزارلیگیگه بېرگن صحبتیده هلاک بۉلگنلر آرهسیده ۱۶ نفر پولیس خادیمی بارلیگینی ایتدی.
اوّلراق کوهات شفاخانهسی باشلیغی طاهرشاه جیو نیوزگه بېرگن معلوماتیده اوشبو پولیس مجموعهسیدهگی پارتلش و تۉقنهشوولرده۱۰۳ کیشی هلاک بۉلگنینی بیلدیرگن اېدی.
هجومچیلر تیناوون توشدن کېین کوهات اولسواللگیدهگی اېسکی «پولیس نیولاینز» مجموعهسی و اونینگ ایچیدهگی مسجدگه هجوم قیلگن.
خیبر-پختونخوا پولیسی باش تیکشیروچیسی دستلب پارتلاوچی مادّهلر آرتیلگن موتر مجموعه دروازهسیگه اوریلگنینی، شوندن سۉنگ آتیشمه باشلنگنینی ایتگن.
اونینگ سۉزلریگه کۉره، کېینراق پولیسنینگ مخصوص بۉلینمهسیده خودکوشلیک پارتلشی هم صادر بۉلگن.
مذکور پولیس مجموعهسیده تروریزمگه قرشی کورهش باشقرمهسی، مخصوص بۉلینمه و پولیسنینگ بیر نېچه مهم بۉلینمهلری جایلشگن.
فرانسه خبرگزارلیگی بیلن صحبتلشگن پولیس رسميسی «بیر نېچه جنگری حلی هم کوهات پولیس مجموعهسی نینگ مخصوص بۉلینمه قِسمیده جایلشگن»، دېب ایتگن.
او قۉشیمچه قیلگن: «اولر بیلن آتیشمه تیناوون کېچقوروندن بېری دوام اېتماقده. هجومچیلرنینگ انیق سانی حاضرچه معلوم اېمس.»
پاکستان رسميلری و اسلام آبادده فعالیت یوریتهیاتگن بیر قطار خارجي دیپلوماتلر اوشبو هجومنی قارهلهگن.
پاکستان طالبلرنینگ سابق قوماندانلریدن بیری بۉلگن حافظ گُل بهادر گروهی اوشبو هجوم اوچون جوابگرلیکنی اۉز ذمّهسیگه آلگن.
پاکستان حافظ گُل بهادر افغانستانده یشهیاتگنینی و اۉز هجوملرینی شو مملکت حدودیدن رېجهلشتیریب، عملگه آشیرهیاتگنینی دعوا قیلماقده.
پاکستان حکومتی بیر نېچه بار حافظ گُل بهادر و اونینگ گروهی اعضالرینی تاپشیریشنی طلب قیلگن، بیراق افغانستاندهگی طالبلر اونینگ مملکت حدودیده اېکنینی رد اېتماقده.
