پاکستان خوفسیزلیک کوچلری مملکت حربيلری «گُلستان» چېگره حدودیده طالبلر هجومینی قَیترگنینی معلوم قیلدی.
رویترر خبریگه کۉره، پاکستان خوفسیزلیک منبعلری جمعه کونی طالبلرنینگ هجوم قیلیشگه اورینیشی حقیده تفصیلات بېرمهگن حالده، تۉقنهشووده اوشبو گروهنینگ بیر نېچه اعضاسی هلاک بۉلگنینی ایتگن.
طالبلر حاضرچه پاکستاننینگ بو دعوالریگه مناسبت بیلدیرمهگن.
طالبلذ نینگ قندهاردهگی ۲۰۶-البدر قول اردوسی کېچه تونده سپین بولدک اولسواللیگی بیلن چېگرهداش حدودلرده پاکستان نینگ چېگره پُستیگه هجوم قیلگنینی معلوم قیلگن اېدی.
اوشبو قول اردو سوزلاوچیسی طالبلر هجوملری عاقبتیده پاکستاننینگ بیر چېگره پُستی بوتونلهی ویران قیلینگنی و پاکستانلیک حربيلر آرهسیده تلفاتلر بۉلگنینی دعوا قیلگن.
طالبلر و پاکستان اۉرتهسیدهگی کېسکینلیک بو هفته پاکستاننینگ افغانستانگه اویوشتیرگن هوا هجوملریدن سۉنگ ینه کوچهیگن.
پاکستان اوردوسی چهارشنبهدن پنجشنبهگه اۉتر کېچهسی قندهار، خوست و پکتیکا ولایتلرینینگ اَیریم حدودلریگه هوا هجوملری اویوشتیردی. پاکستان اوشبو هجوملرده حربي مرکز نشانگه آلینگنینی معلوم قیلگن.
طالبلر اېسه بو هجوملرده تۉرت کیشی هلاک بۉلگنینی بیلدیرگن.
شونینگدېک، پاکستان دوشنبه کونی کنر و پکتیکا ولایتلرینینگ اَیریم حدودلرینی بامباردمان قیلگن. طالبلرنینگ معلوم قیلیشیچه، بونینگ عاقبتیده اوچ کیشی هلاک بۉلگن.
بیراق پاکستان دوشنبه کونگی هجوملرده پاکستانلیک جنگریلرنینگ مرکزلری نشانگه آلینگنی و بونینگ نتیجهسیده ۲۸ جنگری اۉلدیریلگنینی معلوم قیلگن.
اسلام آباد کابلنی چېگرهدن هجوملر اویوشتیرهدیگن پاکستان جنگریلریگه باشپناه بېریشده عیبلهماقده. افغانستان طالبلر حکومتی بو دعوانی رد اېتیب، عصیانچیلیک فعالیتی پاکستان نینگ ایچکی معماسی اېکنینی اَیتماقده.
