پاکستان عامهوي اخبارات واسطهلرینینگ خبر بېریشیچه، خیبر پختونخوا ایالتینینگ «دېره اسمایلخان» منطقهسیدهگی پولیس نظارت-اۉتکزیش پسته پارتلش صادر بۉلیشی عاقبتیده کمیده ۱۱ کیشی هلاک بۉلگن و ینه ۲۰ کیشی یرهلنگن.
دان گزیتهسینینگ خبریگه کۉره، قوتقروو خدمتی مسووللری پارتلش بوگون (شنبه، ۴ میزان) دېره اسمایلخاننینگ «امان میله» منطقهسیده صادر بۉلگنینی ایتگن. هلاک بۉلگنلر آرهسیده سکّیز اېرکک، ایکّی عیال و بیر باله بار.
اوشبو نشر خبریگه کۉره، یرهلنگنلر نینگ ۱۸نفری دستلبکی طبي یاردم کۉرسهتیلگنیدن سۉنگ دوالنیشنی دوام اېتتیریش اوچون «درازنده» منطقهسیدهگی طبیات مرکزلری همده دبره اسمایلخاندهگی «مفتی محمود» شفاخانهسیگه آلیب کېتیلگن.
«دان» گزیتهسی قوتقروو ایشلری و قربانلرنی ویرانهلر آستیدن آلیب چیقیش جریانی واقعه جاییده همان دوام اېتهیاتگنینی یازگن.
پولیسنینگ معلوم قیلیشیچه، پارتلشده یرهلنگنلر آرهسیده بیر نېچه نفر پولیس خادیمی، باجخانه خادملری و ایکّی نفر تینچ اهالی وکیلی بار.
«دان» گزیتهسی خبریگه کۉره، هجومگه اوچرهگن نظارت-اۉتکزیش پونکتی «دیره اسمایلخان–کویته» یۉنهلیشیده خوفسیزلیکنی تأمینلش و تېکشیروو اۉتکزیش مقصدیده تشکیل اېتیلگن اېدی.
حاضرگچه هېچ بیر شخص یاکه گروه اوشبو پارتلش اوچون جوابگرلیکنی اۉز ذمّهسیگه آلمهگن.
خیبر پختونخو ایالتی پاکستانده طالبلر افغانستانده حاکمیتنی اېگهللهگنیدن سۉنگ اېنگ بېقرار ولایتگه ایلنگن.
بیر هفته اوّل اوشبو ولایتنینگ کوهات تومنیدهگی پولیس مجموعهسیده پارتلش و هجوم صادر بۉلگن. اونده کمیده ۳۱کیشی هلاک بۉلگن و ۱۰۰ دن آرتیق کیشی یرهلنگن. هجوم اوچون جوابگرلیکنی حافظ گُل بهادر باشچیلیگیدهگی «اتحاد المجاهدین» گروهی اۉز ذمّهسیگه آلگن.
پاکستان مذکور هجومگه جوابن افغانستاننینگ کنر و پکتیا ولایتلریدهگی نشانلرگه ضربه بېرگن و «پاکستان طالبان حرکتی» همده اونگه علاقهدار گروهلر نینگ باشپناهلرینی نشانگه آلگنینی، ۲۸ نفر «ترورچی» اۉلدیریلگنینی دعوا قیلگن.
بیراق افغانستاندهگی طالبان «تینچ اهالی یشهیدیگن حدودلر» نشانگه آلینگنینی بیلدیرگن و کنرده اوچ نفر تینچ اهالی هلاک بۉلگنینی معلوم قیلگن.
