پاکستان اوردوسی مملکتنینگ بلوچستان ایالتیده سۉنگگی تۉرت کون دوامیده آلیب باریلگن عملیاتلر چاغیده کمیده ۷۱ کیشی «ترورچی» اۉلدیریلگنینی معلوم قیلدی.
پاکستان اوردوسی بوگون (یکشنبه، ۵میزان) نشر قیلگن بیاناتیده هلاک بۉلگنلرنی «فتنه خوارج» و «فتنه هندستان» گروهلری اعضالری دېب اتهگن. بو اتَمهلر پاکستان تامانیدن «پاکستان طالبان حرکتی» و «بلوچستان آزادلیک حرکتی»گه نسبتاً قۉللنهدی.
پاکستان اوردوسی بیاناتیده ایتیلیشیچه، کویته شهرینینگ شابان منطقهسبده اۉتکزیلگن ایکّی علیحده عملیاتده ۵۶کیشی، نوشکی اولسواللیگیدهگی ینه بیر عملیاتده اېسه هندستان تامانیدن قۉللب-قوّتلنگن ۱۱ نفر «ترورچی» اۉلدیریلگن.
شونینگدیک پاکستان اوردوسی میند منطقهسیده اۉتکزیلگن عملیات چاغیده «فتنه هندستان» گروهینینگ ینه آلتی اعضاسی اۉلدیریلگنینی بیلدیرگن.
پاکستان اوردوسی بیاناتیگه کۉره، «شابان و بلوچستاننینگ باشقه منطقهلریده سۉنگگی ۹۶ ساعت دوامیده جمعی ۷۱نفردن آرتیق ترورچی اۉلدیریلگن. بو هندستان تامانیدن قۉللب-قوّتلنهیاتگن افغانستانلیک واسطهچی کوچلرگه آغیر ضربه حسابلنهدی».
پاکستان اوردوسی افغانستان طالبلریگه علاقهدار کوچلر هندستان نینگ کمهگی و قۉللب-قوّتلشی بیلن پاکستانده عملگه آشیریلهیاتگن ترورچیلیک فعالیتلریده همان اشتراک اېتهیاتگنی، بونینگ نتیجهسیده آدملر هلاک بۉلهیاتگنی و بو حالت تینچلیک همده برقرارلیککه تهدید سالهیاتگنینی بیلدیرگن.
پاکستان افغانستان توپاغیدن بو مملکتگه قرشی فایدهلنیلهیاتگنینی دعوا قیلیب کېلهدی. پاکستان اوردوسی انه شو دعواگه اساسلنیب، بیر نېچه بار افغانستاندهگی نشانلرگه هجوم قیلگن. جملهدن، مملکت اۉتگن هفته افغانستاننینگ بیر نېچه ولایتیگه ایکّی مرته هجوم قیلگن.
طالبلر اېسه افغانستان توپراغیدن پاکستانگه قرشی فایدهلنیلهیاتگنینی رد اېتهدی و هېچ بیر گروهگه مملکت حدودیدن باشقه دولتلرگه قرشی فایدهلنیشگه رخصت بېرمسلیگینی ایتهدی.
