بیرلشگن ملتلر تشکیلاتینینگ ترقیات دستوری و بیرلشگن ملتلر تشکیلاتینینگ خاتین-قیزلر بۉلیمی «افغانستان عیاللری اوچون برقرار تجارت جمغرمهسی»نی ایشگه توشیریش و دستلبکی ۱.۷ میلیون دالرگه یقین سرمایه کیریتیش آرقهلی کېلگوسی بیر ییل دوامیده ۱ مینگ ۵۰۰ نفر عیال تدبیرکارنی قۉللب-قوّتلشلرینی ایتدی.
بو ایکّی تشکیلات بیاناتیده اوشبو جمغرمه «شریعت تمایللریگه موافق مالیوي خدمتلر تقدیم اېتیش بیلن بیرگه، تجارتنی رواجلنتیریش، جملهدن، مالیوي و رقملی سوادخانلیک بۉییچه تری نینگلر، مېنتارلیک (یۉل-یۉری مصلحت)، تجارت رېجه توزیش همده بازارلرگه چیقیشنی قۉللب-قوّتلش خدمتلرینی هم تقدیم اېتیشینی» بیلدیرگن.
بیرلشگن ملتلر تشکیلاتی ترقیات دستوری و بیرلشگن ملتلر تشکیلاتینینگ خاتین-قیزلر بۉلیمی اوشبو لایحهنی کېنگهیتیریش اوچون ینه ۱۰میلیون دالر مبلغ سفربر قیلیشگه حرکت قیلیشلرینی ایتدی. بو ینه ۱۰ مینگ نفر عیال تدبیرکارنینگ مالی منبعلر و تجارتنی قۉللب-قوّتلش خدمتلریدن فایدهلنیشیگه امکان یرهتیشی همده بالواسطه قریب ۷۰ مینگ کیشیگه منفعت کېلتیریشی ممکن.
ایکّی تشکیلاتنینگ تأکیدلشیچه، «افغانستان عیاللری اوچون برقرار تجارتلر جمغرمهسی» نینگ ایشگه توشیریلیشی افغانستانلیک عیال تدبیرکارلر دوچ کېلهیاتگن کتّه مالی تقچیللیککه جوابدیر.
تشکیلاتلر بیاناتیگه کۉره، افغانستاندهگی عیاللر نینگ ۷ فایزیدن کمراغی بانک حسابیگه اېگه یاکه مبایل پول خدمتلریدن فایدهلنهدی. بو حالت عیاللر باشقرهیاتگن کۉپلب بیزنسلرنینگ فعالیت یوریتیشی و رواجلنیشی اوچون شخصي جمغرمهلر، عایله و دۉستلردن آلینگن قرضلر یاکه شخصي مال-ملکنی ساتیشگه تهیهنیشیگه سبب بۉلگن.
ایکّی تشکیلاتنینگ قۉشیمچه قیلیشیچه، عینِ پیتده افغانستان عیاللری درآمد تاپیش و عایلهلرینینگ خرجتلرینی تأمینلش اوچون تاباره کۉپراق تدبیرکارلیککه مراجعت قیلماقده.
اولرنینگ ایتیشیچه، حاضر افغانستانده ۱۰ مینگدن آرتیق عیال تجارت یوریتیش اوچون حجتگه اېگه بۉلیب، بو بېش ییل اوّلگی کۉرسهتکیچدن ۱۰ برابر کۉپدیر. افغانستان سودا-صناعت اتاقی اېسه ینه ۱۲۰ مینگ نفر عیال حجتسیز تجارت فعالیتی بیلن شغللنهیاتگنینی تخمین قیلماقده.
بیرلشگن ملتلر تشکیلاتی ترقیات دستورینینگ افغانستاندهگی وکیلی تورخان صالح شوندهی دېدی: «افغانستانلیک عیال تدبیرکارلر آلدیدهگی معما تدبیرکارلیک روحی نینگ یۉقلیگی اېمس، بلکه رواجلنیش اوچون ضرور بۉلگن مالی منبعلر، کۉنیکمهلر و ترماقلردن فایدهلنیش امکانیتینینگ چېکلنگنیدهدیر.»
اونینگ قۉشیمچه قیلیشیچه، بیرلشگن ملتلر تشکیلاتی ترقیات دستوری و بیرلشگن ملتلر تشکیلاتینینگ خاتین-قیزلر بۉلیمی «افغانستان عیاللری اوچون برقرار تجارتلر جمغرمهسی»نی ایشگه توشیریش آرقهلی اوشبو عیاللرنی قۉللب-قوّتلشنینگ «شریعتگه موافق و گرو طلب قیلمهیدیگن مالیهلشتیریش، بیزنس بۉییچه عملي کمک و دایمي منتارلیک» کبی یۉنهلیشلرینی تأمینلهگن. بو عیاللرگه اۉز تجارتلرینی مستحکملش، برقرارلیگینی آشیریش همده اۉزلری و عایلهلری اوچون خوفسیزراق تیریکچیلیک منبعینی یرهتیشگه یاردم بېرهدی.
بیرلشگن ملتلر تشکیلاتینینگ افغانستاندهگی خاتین-قیزلر بۉلیمی وکیلی سوزان فرگوسن هم عیاللرنینگ عیاللر باشقهگرهیاتگن بیزنسلرنی رواجلنتیریش اوچون مالی منبعلردن فایدهلنیش امکانیتینی کېنگهیتیریش مهم اېکنینی ایتدی.
او شوندهی دېدی: «افغانستان عیاللری دوچ کېلهیاتگن کۉپلب تۉسیقلرگه قرهمهی، تجارت یرهتیش یۉللرینی تاپماقده. مالی منبعلردن فایدهلنیش امکانیتینی کېنگهیتیریش عیال تدبیرکارلرگه اۉز غایهلری و کۉنیکمهلرینی ینهده کوچلی بیزنسلر، کۉپراق ایش اۉرینلری همده اۉز عایلهلری و جماعهلری اوچون یوقاریراق اقتصادي خوفسیزلیککه ایلنتیریشگه یاردم بېریشی ممکن.»
طالبلر افغانستان اوستیدن قَیته نظارتنی قۉلگه کیریتگنیدن سۉنگ، افغانستانلیک عیاللرنینگ تعلیم آلیشی و ایشلشینی تعقیقلب، چېکلب قۉیدی همده اولرنینگ جمعیتدهگی اشتراکیگه کېنگ کۉلملی چېکلاولر جاري اېتدی.
شونگه قرهمهی، افغانستاننینگ اَیریم عیاللری کیچیک بیزنسلر تشکیل اېتیش، باشقه عیاللر اوچون ایش امکانیتلرینی یرهتیش و عایلهلرینینگ تیریکچیلیگینی تأمینلشگه حرکت قیلیشده دوام اېتماقده
