۲۹ میزان، اۉزبېک تیلی ملي کونی مناسبتی بیلن لندن‌ده یازووچیلر، شاعرلر، عیاللر، سیاسي و مدني فعاللر همده اۉزبېک یاشلریدن عبارت بیر گروه اشتراکیده بیره‌م تدبیری اۉتکزیلدی.
محفل اشتراکچیلری اۉزبېک تیلی ملي کونینی، اینیقسه، افغانستاندن تشقریده نشانلش مهم اېکنینی تأکیدلب، بونده‌ی تدبیرلر مدني و تیل قدریتلرینی اسره‌ب-اوه‌یلش، مدني میراثنی کېله‌جک اولادلرگه یېتکزیش همده اۉزبېک تیلیده سۉزلشووچی جماعه‌‌نینگ تیل و مدني اۉزلیگینی مستحکملشده مهم اهمیتگه اېگه اېکنینی قید اېتدیلر.
سۉزگه چیققنلر، شونینگدېک، یاش اولاد آره‌سیده اۉزبېک تیلینی ترغیب قیلیش ضرورلیگیگه اعتبار قره‌تیب، خارجي مملکتلرده اۉتکزیله‌دیگن بونده‌ی مدني و ادبي تدبیرلر باله‌لر همده یاشلرنی آنه تیلی، ادبیات، صنعت و اۉزبېک مدنیتی بیلن یقیندن تنیشتیریش اوچون مهم امکانیت یره‌تیشینی تأکیدله‌دیلر.
تدبیر دایره‌سیده تورلی مدني و بدیعي دستورلر هم نمایش اېتیلدی. اۉزبېک ملي و عنعنوي طعاملری، اۉزبېک ملي کییملری نمایشی، شعرخوانلیک، موسیقهی اجرالری همده باشقه مدني دستورلر تدبیر‌نینگ اساسي قِسملریدن بۉلدی.
اشتراکچیلر ملي اۉزبېک کییملرینی کيیب، محلي و عنعنوي طعاملرنی نمایش اېتیش آرقه‌لی اۉزبېک خلقی‌نینگ بای مدنیتی، عرف-عادتلری و عنعنه‌لری‌نینگ اَیریم نمونه‌لرینی نمایش اېتدیلر.
تدبیر آنه تیلینی، ملي قدریتلر و مدني میراثنی اسره‌ب-اوه‌یلش مهم‌لیگی تأکیدلنگن حالده، صمیمي و مدني محیطده اۉتکزیلدی. محفل یکونیده اشتراکچیلر بیرگه‌لیکده طعام تناول قیلیب، اۉز ارا صحبتلشدیلر.
