طالبلرنینگ تشقی ایشلر وزیری امیرخان متقی و بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) ینگی باشلیغی رباب فاطمه ایلک اوچره‌شوو و صحبتلریده اۉزارا توشونیش همده مثبت همکارلیکنی دوام اېتتیریشگه اورغو بېردیلر.
طالبلر تشقی ایشلر وزیرلیگی بوگون کېچقورون (یک‌شنبه، ۲۶ میزان) بیانات ترقه‌تیب، اوشبو اوچره‌شوو حقیده خبر بېردی. وزیرلیک‌نینگ معلوم قیلیشیچه، تامانلر افغانستان و بیرلشگن ملتلر تشکیلاتی اۉرته‌سیده‌گی همکارلیکنی کېنگه‌یتیریش، قَیتیب کېله‌یاتگن افغانلرنینگ انسانی احتیاجلری همده انسان پرورلیک یاردملرنی ثمره‌لی موافقلشتیریش مسأله‌لرینی بحث قیلگنلر.
وزیرلیک‌نینگ قۉشیمچه قیلیشیچه، شو دایره‌ده اقتصادي فعالیت و انسان پرورلیک یاردملرنی سیاسي مسأله‌لردن علیحده توتیش، گومانیتار احتیاجلرنی قاندیریش، شونینگدېک، ترقیات و آست‌قورمه لایحه‌لرینی قۉللب-قوّتلشنی آشیریشگه اورغو بېریلگن.
طالبلر تشقی ایشلر وزیرلیگی، شونینگدېک، بیرلشگن ملتلر تشکیلاتی‌نینگ افغانستان حقیده‌گی گزارشلری و بهالشلری یوزه‌سیدن انیق و ایشانچلی معلوماتلردن فایده‌لنیش، مملکتده‌گی حقیقي وضعیتنی موازنتلی عکس اېتتیریش همده طالبلرنینگ تېگیشلی اداره‌لری بیلن ضرور موافقلیکنی تأمینلش مهم‌لیگیگه اورغو بېریلگنینی ایتگن.
وزیرلیک معلوماتیگه کۉره، تامانلر اقلیم اۉزگریشی بیلن باغلیق افغانستان‌نینگ احتیاجلری و معمالرینی حل قیلیش بۉییچه همکارلیک مسأله‌سینی هم محاکمه قیلگنلر.
طالبلر تشقی ایشلر وزیرلیگی، شونینگدېک، دوحه جریانی‌نینگ خصوصي سکتور و گیاهوند مادّه‌لر بیلن کوره‌شیش بۉییچه ایشچی گروهلری فعالیتی، اوشبو گروهلر نینگ بۉله‌جک ییغیلیشلری همده تېگیشلی تشکیلاتلر اۉرته‌سیده‌گی موافقلشتیریش مسأله‌لری یوزه‌سیدن هم صحبتلشیلگنینی بیلدیرگن.
وزیرلیک‌نینگ یازیشیچه، اوچره‌شوو یکونیده هر ایکّی تامان اۉزارا توشونیشنی دوام اېتتیریش، ملاقاتنی رواجلنتیریش و افغانستان همده بیرلشگن ملتلر تشکیلاتی اۉرته‌سیده‌گی همکارلیکنی ینه‌ده مستحکملشگه اورغو بېرگن.
بیرلشگن ملتلر تشکیلاتی‌نینگ افغانستانده‌گی یاردم اداره‌سی حاضرچه اوشبو اوچره‌شوو یوزه‌سیدن ایضاح بېرمه‌گن.
بو رباب فاطمه‌‌نینگ بیرلشگن ملتلر تشکیلاتی باش کاتبی‌نینگ مخصوص وکیلی و تشکیلات نینگ افغانستانده‌گی یاردم اداره‌سی باشلیغی صفتیده طالبلرنینگ بیرار رسميسی بیلن ایلک اوچره‌شوویدیر.
بنگلادشلیک دیپلومات یقینده کابلگه کېلیب، اۉز فعالیتینی باشله‌گن.
