بیرلشگن ملتلر تشکیلاتی‌نینگ کوردیناتوری (اوچا) افغانستان‌ده آزیق-طعام خوفسیزلیگی و تۉییب طعاملنمسلیک بیلن باغلیق خواطرلر کوچه‌یه‌یاتگن بیر پیتده، مملکتده‌گی آزیقلنتیریش مرکزلری‌نینگ اوچدن بیر قِسمی مبلغ یېتیشمسلیگی سببلی یاپیلگنینی معلوم قیلدی.
اوچانینگ آگاهلنتیریشیچه، کېلگوسی ییلده آلتی یاشگچه بۉلگن تۉرت میلیوندن آرتیق گودک و باله اۉتکیر تۉییب طعاملنمسلیک حالتی بۉییچه دوالنیشگه محتاج بۉله‌دی.
اوچانینگ معلوماتیگه کۉره، سپتمبر و اکتوبر آیلریده ۱۵.۹ میلیون کیشی، یعنی افغانستان اهالیسی نینگ قریب اوچدن بیر قِسمی آزیق-طعام خوفسیزلیگی‌نینگ بحرانلی یاکه اوندن هم آغیر درجه‌سیگه دوچ کېلگن. اولرنینگ ۳.۴میلیون نفری فوق العاده حالتده بۉلگن.
نوامبردن اپرېلگچه دوام اېته‌دیگن آزیق-طعام تنقیصلیگی موسمیده وضعیت ینه‌ده آغیرلشیشی کوتیلماقده.
اوچا سوزلاوچیسی اولگا چرویکو بوگون (سه‌شنبه، ۲۸میزان) آنلاین مطبوعات انجمنیده شونده‌ی دېدی: «اۉتکیر آزیق-طعام خوفسیزلیگیگه دوچ کېله‌یاتگن آدملر سانی ۱۹.۲ میلیون نفرگه یېتیشی کوتیلماقده. اولرنینگ بېش میلیون نفری فوق العاده درجه‌ده‌گی آچرچیلیککه دوچ کېلیشی ممکن. بو حالت آچرچیلیک اعلان قیلینیشیدن بیر باسقیچ آلدینگی درجه‌دیر.»
او قۉشیمچه قیلدی: «بیز قیشدن آلدین حرکت قیلیشیمیز کېره‌ک، عایله‌لر برچه امکانیتلرینی یۉقاتگنیدن کېین اېمس. بو محتاج آدملرگه آزیق-طعام یاردمینی یېتکزیش، چاروا ماللری و درآمد کېلتیرووچی ملکلرنی حمایه قیلیش، اېکیش اوچون مهم مدتلر توگه‌شیدن آلدین دهقانلرنی قۉللب-قوّتلش همده اساسي ساغلیقنی سقلش، آزیقلنتیریش و سوو خدمتلریدن فایده‌لنیش امکانیتینی تأمینلشنی انگله‌ته‌دی.»
آزیق-طعام خوفسیزلیگی باسقیچلرینی انتیگراسیون‌لشگن تصنیفلش نینگ اېنگ سۉنگگی بهالشیگه کۉره، کېلگوسی ییلده آلتی آیلیکدن بېش یاشگچه بۉلگن تۉرت میلیوندن آرتیق باله اۉتکیر تۉییب طعاملنمسلیک بۉییچه دوالنیشگه محتاج بۉلیشی کوتیلماقده.
جبنواده بۉلیب اۉتگن مطبوعات انجمنیده کابل‌دن توریب سۉزله‌گن چېرویکا: «اولر نینگ بیر میلیوندن آرتیغی آغیر درجه‌ده‌گی اۉتکیر تۉییب طعاملنمسلیکدن اذیت چېکیشی کوتیلماقده»، دېدی.
او ینه شونده‌ی دېدی: «بو رقملر آته-آنه‌لری تۉییملی آزیق-طعام ساتیب آلیش امکانیگه اېگه بۉلمه‌گن باله‌لر همده ییللر دوام اېتگن اوروش، اقتصادي معمالر، قورغاقچیلیک و باشقه ضربه‌لر عاقبتیده انقراضلرگه قرشی کوره‌شیش امکانیتی ضعیفلشگن عایله‌لر نینگ احوالینی کۉرسه‌ته‌دی.»
آچرچیلیک بحرانی اوجیگه چیققن بیر پیتده، افغانستان بۉیلب آزیقلنتیریش مرکزلری‌نینگ قریب اوچدن بیری یاپیلگن یاکه خدمت کۉرسه‌تیشنی توخته‌تگن. اوچا معلوماتیگه کۉره، بونگه اساسن مبلغ یېتیشمسلیگی سبب بۉلگن.
چرویکو «اوشبو خدمتلر تا‘خته‌تیلگنیدن کېین اونینگ عاقبتلری، اینیقسه باله‌لر اوچون، قَیتریب بۉلمه‌یدیگن بۉلیشی ممکن»، دېدی.
افغانستانگه کۉرسه‌تیله‌یاتگن خلق‌ارا یاردم کېسکین کمه‌یگن. بیرلشگن ملتلر تشکیلاتی معلوم قیلیشیچه، اگوست آیی آخریگه قدَر حیاتي مهم یاردملرنی یېتکزیش اوچون ضرور بۉلگن مبلغ نینگ ۳۰ فایزیدن هم کمراغی تأمینلنگن.
مذکور گومانیتار انقراض ۲۰۲۳-ییلدن بویان اېران و پاکستاندن میلیونلب مهاجرلر نینگ مجبوري روشده قَیتریلیشی همده بیر قطار طبيعي آفتلر آرتیدن ینه‌ده کوچه‌یدی.
چرویکو نینگ ایتیشیچه، انسان پرورلیک یاردم انسانلر حیاتینی سقلب قالیشی ممکن، بیراق او اقتصادي امکانیتلر و دولت خدمتلری نینگ اۉرنینی چېکسیز مدت دوامیده باسه آلمه‌یدی.
اونینگ قۉشیمچه قیلیشیچه، افغانستانده‌گی آزیق-طعام بحرانی فقط آزیق-طعام نینگ موجود یاکه موجود اېمسلیگی بیلن باغلیق اېمس. اهالی نینگ آزیق-طعامگه اېگه بۉلیش امکانیتی و اونی ساتیب آلیش قابلیبی هم اوشبو بحران نینگ اساسي عامللریدندیر.
اونینگ سۉزلریگه کۉره، جاري ییلده یاغینگرچیلیک نینگ یخشیلنیشی و قیشلاق خۉجه‌لیگی محصولاتلری ایشلب چیقریشی‌نینگ آشیشی وضعیت نینگ یخشیلنیشیگه یاردم بېرگن بۉلسه-ده، «بیر مرته یخشی حاصل آلیش بیر نېچه ییللیک قورغاقچیلیک یېتکزگن ضررنی قاپله‌ی آلمه‌یدی».
