افغانستان‌نینگ بیرلشگن ملتلر تشکیلاتی‌ده‌گی نماینده‌لیگی سرپرستی نصیر احمد فایق قطر وزیرلریدن بیری نینگ بیاناتلریگه مناسبت بیلدیریب، اقتصادي و ترقیات ساحه‌سیده‌گی همکارلیک طالبلر حکومتینی قانونيلشتیریش یاکه بو گروه حاکمیتینی مستحکملش واسطه‌سیگه ایلنمسلیگی کېره‌کلیگینی ایتدی.
فایق بوگون کېچقورون (سه‌شنبه، ۲۸ میزان) ایکس اجتماعي ترماغیده یازیشیچه، «افغانستان اقتصادیاتینی تیکلشنی بو مملکت خلقی‌نینگ، اینیقسه طالبلر حکمرانلیگی آستیده هنوزگچه تیزیملی کمسیتیش و چېکلاولرگه دوچ کېله‌یاتگن عیاللر و قیزلر نینگ اساسي حقوقلریدن اجره‌تیب بۉلمه‌یدی».
او شونده‌ی قۉشیمچه قیلگن: «افغانستان خلقیگه انسان پرورلیک یاردم کۉرسه‌تیش دوام اېتیشی کېره‌ک. اما اقتصادنی برقرار روشده یخشیلش و اوزاق مدتلی برقرارلیککه اېریشیش اوچون افغان خلقی‌نینگ اۉزی باشچیلیگیده‌گی ایشانچلی و اینکلیوزیو سیاسي جریان ضرور. بو جریان خلق اراده‌سی، عدالت و افغانستان‌نینگ خلق‌ارا مجبوريتلریگه حرمت اساسیده قانوني و مسوولیتلی حکومت شکللنیشیگه آلیب کېلیشی کېره‌ک».
فایق تأکیدله‌گنیدېک، «افغانستان عیاللری و خلقی اقتصادي وعده‌لردن کۉره کۉپراق نرسه‌گه لایق. اولر اېرکینلیک، انساني قدر-قیمت، عدالت و مملکت کېله‌جگینی بېلگیلشده ثمره‌لی آوازگه اېگه بۉلیش حقوقیگه لایقدیر».
قطر دولتی‌نینگ خلق‌ارا همکارلیک مسأله‌لری بۉییچه مریم بنت علی بن ناصر المسند دوحه‌ده بۉلیب اۉتگن «افغانستاننی موافقلشتیریش گروهی» ییغیلیشیده گومانیتار یاردم کۉرسه‌تیش باسقیچیدن افغانستان اقتصادیاتینی تیکلش و خصوصي سکتورنی قۉللب-قوّتلش باسقیچیگه اۉتیشگه چقیرگن.
او، شونینگدېک، اوزاق مدتلی برقرارلیکنی مستحکملش همده افغانستان اقتصادیاتینی برقرار تیکلش اوچون یۉل آچیش مقصدیده خلق‌ارا همکارلیکنی کوچه‌یتیریش و سعی-حرکتلرنی موافقلشتیریشگه چقیرگن.
قطر طالبلر افغانستانده حاکمیتنی قَیته اېگه‌لله‌گنیدن بېری بو گروه بیلن کېنگ سیاسي علاقه‌لرنی آلیب بارماقده. دوحه خلق‌ارا ییغیلیشلرده اساسن خلق‌ارا یاردمنی دوام اېتتیریش و مملکتلر نینگ طالبلر بیلن اقتصادي همکارلیگینی کوچه‌یتیریش طرفداری بۉلیب کېلگن.
قطر رسميلری، شونینگدېک، طالبلر، امریکا و اروپا دولتلری اۉرته‌سیده محبوسلرنی اییرباشلش همده افغانستانلیک مهاجرلرنی چیقریب یوباریش مسأله‌لریده‌گی مذاکره‌لرده واسطه‌چیلیک قیلگن.
