۲۹ میزان، اۉزبېک تیلی ملي کونی مناسبتی بیلن بوگون (جمعه، ۱ عقرب) توشدن آلدین قندوز شهریده بیلیم یورتی‌نینگ اۉقیتووچیلری، شاعرلر، یازووچیلر، قوم آقسقاللری، مدنیت نماینده‌لری و یاشلر اشتراکیده طنطنه‌لی تدبیر بۉلیب اۉتدی.
مذکور محفل بیر قنچه بیلیم یورتی‌نینگ اۉقیتووچیلری و اۉزبېک ضیالیلری تامانیدن تشکیل اېتیلدی. اونده اشتراکچیلر اۉزبېک تیلی نینگ اهمیتی، اونینگ مدنیت و ادبیاتده‌گی اۉرنی همده بو تیلنی اسره‌ب-اوه‌یلش ضرورلیگینی تأکیدله‌دیلر.
محفل‌ده سۉزگه چیققنلر اۉزبېک تیلی‌نینگ موقعی، اونی سقلش و رواجلنتیریش مهم‌لیگی حقیده فکر بیلدیردیلر. شونینگدېک، بیر گروه یاشلر اۉزبېک تیلی همده اونینگ مدني و ادبي قدریتلرینی مدح اېتووچی شعرلرینی اۉقیب اېشیتتیردیلر.
محفل دایره‌سیده اۉزبېک تیلیده یقینده نشر اېتیلگن بیر قطار کتابلر هم نمایش اېتیلدی. بوندن تشقری، افغانستان اۉزبېکلری‌نینگ ملي طعاملری، عنعنوي کییملری و هنرمندچیلیک بویوملری کۉرگزمه‌گه قۉییلدی. اوشبو کۉرگزمه اۉزبېک خلقی‌نینگ مدني میراثی و عنعنه‌لرینی عکس اېتتیردی.
قندوزده اوشبو مخفل اۉتکزیلگن بیر پیتده، بوگون اۉزبېک تیلی ملي کونی مناسبتی بیلن سرپل ولایتی نینگ سنچارک اولسواللیگی و فاریاب ولایتی‌نینگ اندخوی اواسواللیکلریده هم شونگه اۉخشش تدبیرلر تشکیل اېتیلدی.
افغانستان‌ده میزان اۉزبېک تیلی ملي کونی صفتیده نشانلنه‌دی. هر ییلی اوشبو سنه مناسبتی بیلن اۉزبېک تیلی، ادبیاتی و مدني میراثینی اسره‌ب-اوه‌یلشگه قره‌تیلگن مدني و ادبي تدبیرلر اۉتکزیله‌دی.
