نیویارک تایمز گزیته‌سی‌نینگ خبر بېریشیچه، پاکستان‌نینگ حربي و استخبارات اداره‌لری وکیللری سۉنگگی آیلرده طالبلرگه قرشی قوراللی گروهلر یېتکچیلری بیلن اوچره‌شیب، اولرگه احتمالي یاردم کۉرسه‌تیش مسأله‌سینی محاکمه قیلگن.
گزیته بوگون (پنج‌شنبه، ۳۰ میزان) اعلان قیلگن خبریده بو معلوماتنی پاکستان استخباراتی‌نینگ بیر وکیلی، افغانستان ملي خوفسیزلیک کېنگشی‌نینگ سابق رسميسی همده طالبانگه قرشی قوراللی گروهلردن بیری‌نینگ یوقاری مرتبه‌لی اعضاسیگه ته‌یه‌نیب کېلتیرگن.
نیویورک تایمز بو باره‌ده باتفصیل معلومات بېرمه‌گن و اوچره‌شوولرده قتنه‌شگن طالبلرگه قرشی قوراللی گروهلر یېتکچیلری نینگ شخصینی هم آشکار قیلمه‌گن.
طالبلر سۉنگگی آیلرده پاکستاننی اوشبو گروهگه قرشی قوراللی کوچلرنی قۉللب-قوّتلشده بیر نېچه بار عیبله‌گن. بیراق پاکستان رسميلری بو دعوالرنی اساسسیز دېب اته‌گن.
طالبلر خصوصاً، جاري آی نینگ باشیده نورستان ولایتی‌نینگ کامدیش تومنیده یوز بېرگن تۉقنه‌شوولردن سۉنگ، «بوزغونچی فتنه‌چیلر و داعش» پاکستان حربي رېجیمی‌نینگ کۉمه‌گیده اوشبو ولایتگه کیریب کېلگنینی دعوا قیلگن.
بیراق «افغانستان آزادلیک‌جبهه‌سی» اۉز جنگچیلری نورستان‌نینگ کامدیش تومنیده طالبلر بیلن تۉقنه‌شگنینی و اَیریم حدودلرنی هم نظارتیگه آلگنینی بیلدیرگن.
مذکور تۉقنه‌شوولردن سۉنگ هر ایکّی تامان بیر-بیریگه کتّه تلفات یېتکزگنینی دعوا قیلگن.
ن
