بیرلشگن ملتلر تشکیلاتی‌نینگ اهالیشناسلیک جمغرمه‌سی افغانستانده معلوللیگی بۉلگن انسانلرنینگ آوازی اېشیتیلیشی و اولر قرار قبول قیلیش جریانلریده اشتراک اېتیشی کېره‌کلیگینی تأکیدله‌ماقده.
اوشبو تشکیلات بوگون (جمعه، ۱عقرب) ایکس اجتماعي ترماغیده نشر قیلگن پیامیده بویوک بریتانیا تشقی ایشلر وزیرلیگی بیلن همکارلیکده معلوللیگی بۉلگن شخصلر تشکیلاتلری اشتراکیده سمینار تشکیل اېتگنینی معلوم قیلدی.
تشکیلات‌نینگ بیلدیریشیچه، مذکور سمینار معلوللیگی بۉلگن شخصلر تشکیلاتلری اشتراکیده اولرنینگ حیاتي تجربه‌لری و اوستوار یۉنه‌لیشلری حقیده معلومات آلیش مقصدیده اۉتکزیلگن.
بیرلشگن ملتلر تشکیلاتی‌نینگ اهالیشناسلیک جمغرمه‌سی‌نینگ افغانستانده‌گی وکالت‌خانه‌سی معلوللیگی بۉلگن انسانلرگه تعلقلی هېچ قنده‌ی قرار اولرنینگ اۉزلری اشتراکیسیز قبول قیلینمسلیگی کېره‌کلیگینی بیلدیردی.
تشکیلات معلوللیگی بۉلگن انسانلر اۉز حیاتینی بېلگیلب بېره‌دیگن قرارلرده ثمره‌لی فکر بیلدیریش حقوقیگه اېگه اېکنینی تأکیدله‌دی.
افغانستانده اۉنلب ییللر دوام اېتگن اوروش، قشّاقلیک و طبي خدمتلر نینگ یېتیشمسلیگی مملکت اهالیسی‌نینگ سلماقلی قِسمی معلول بۉلیب قالیشیگه سبب بۉلگن.
افغانستان‌نینگ سابق حکومتی ۲۰۱۹-ییلده قانون لایحه‌سینی تصدیقله‌گن اېدی. اونگه کۉره، دولت اداره‌لری و دولت فقرالیک خدمتیده‌گی خادملرنینگ کمیده اوچ فایزی تېگیشلی طلبلرگه جواب بېره‌دیگن معلوللیگی بۉلگن شخصلر آره‌سیدن ایشگه قبول قیلینیشی کېره‌ک اېدی. بیراق طالبلر حاکمیتگه کېلگنیدن سۉنگ معلوللیگی بۉلگن انسانلرنی قۉللب-قوّتلشگه قره‌تیلگن اوشبو قانون همده اونی عملگه آشیریش اوچون مسوول بۉلگن «دولت باشقرووی و فقرالیک خدمتی اصلاحاتلری مستقل کمیسیونسی» توگه‌تیلدی.
بیرلشگن ملتلر تشکیلاتی ۲۰۲۴-ییل دسامبر آییده نشر قیلگن گزارشیده افغانستانده قریب ۱.۵میلیون کیشی «سېزیلرلی درجه‌ده‌گی معلوللیک» بیلن یشه‌یاتگنینی معلوم قیلگن.
شونینگدېک، خلق‌ارا انسان حقوقلری تشکیلاتی ۲۰۲۴-ییل فبروری آییده اعلان قیلگن گزارشیده «آسیا جمغرمه‌سی» نینگ ۲۰۱۹-ییلده‌گی تدقیقاتیگه اساسلنیب، افغانستانده‌گی هر بېش نفر کتّه یاشلی کیشیدن قریب تۉرت نفری و هر بېش نفر باله‌دن بیری جسماني، حسسي، عقلي یاکه بیولوژیکی معلوللیک نینگ بیرار توریگه اېگه اېکنینی بیلدیرگن.
