طالبلرنینگ خوست ولایتی واليسی مطبوعات سوزلاوچیسی مستغفر گربز اوشبو گروه نینگ امر به معروف و نهي از منکر اداره‌‌سی مسووللری ۶۵۰ ته موسیقی چه‌لیش و اجرا اېتیش واسطه‌سینی یاقیب یوبارگنینی معلوم قیلدی.
گربز بوگون (چهارشنبه، ۱۳ عقرب) نشر قیلگن بیاناتیده موسیقی اسبابلری بیلن بیرگه معلوم مقدارده‌گی موشکبازلیک واسطه‌لری هم یۉق قیلینگنینی ایتگن.
اونینگ قۉشیمچه قیلیشیچه، یاقیب یوباریلگن ۶۵۰ ته موسیقی اسبابی سۉنگگی تۉرت آی دوامیده خوست ولایتی مرکزی و تورلی تومنلریدن ییغیب آلینگن.
طالبان افغانستانده قَیته حاکمیتنی اېگه‌له‌گنیدن سۉنگ، موسیقی کبی صنعت نینگ تورلی تورلرینی «حرام» و «تعقیقلنگن» دېب اعلان قیلگن. بو گروه فقط اۉزینی مدح اېتووچی شعر و نعتلرنی اۉقیشگه رخصت بېرگن.
طالبلرنینگ امر به معروف محتسبچیلری مملکت بۉیلب موسیقی چه‌لیش و اجرا اېتیش واسطه‌لرینی ییغیب آلماقده. اولر اوشبو وظیفه‌نی بجریش دوامیده بیر نېچه بار قوراللنگن حالده فقرالر نینگ تۉی مراسملریگه باستیریب کیرگن. اَیریم حاللرده بو تۉقنه‌شوولرگه سبب بۉلیب، عاقبتده هلاک بۉلگنلر و یره‌لنگنلر هم بار.
جمله‌دن، اۉتگن هفته طالبلرنینگ بدخشان ولایتی شهری بزورگ اولسواللیگیده‌گی بیر تۉی مراسمیده موسیقینی توخته‌تیش اوچون اره‌لشوویدن سۉنگ تۉقنه‌شوو یوز بېرگنی خبر قیلینگن اېدی. عاقبتده بیر کیشی هلاک بۉلگن، ینه تۉرت کیشی یره‌لنگن. مذکور واقعه حقیده خبر ترقه‌لگنیگه سکّیز کون بۉلگنیگه قره‌مه‌ی، طالبلر حاضرگچه بو باره‌ده رسماً ایضاح بېرمه‌گن.
