غزنی و بلخ ولایتلریده یوز بیرگن اوچته علیحده ترافیک حادثه‌سی عاقبتیده ۱۲ کیشی هلاک بۉلگن.
غزنی ولایتیده طالبلر مدافعه وزیرلیگیگه قره‌شلی «انترنشنل» روسوملی حربي موتر ملکی موتر بیلن تۉقنه‌شیشی عاقبتیده سکّیز کیشی هلاک بۉلگن.
غزنیده‌گی محلي منبع نینگ ایتیشیچه، اوشبو حادثه بوگون (چهارشنبه، ۱۳عقرب) ساعت ۱۱:۰۰ لر اطرافیده غزنی شهری حدودیده‌گی «کوتل روضه» منطقه‌سیده صادر بۉلگن.
منبعگه کۉره، طالبلرنینگ «انترنشنل» روسوملی حربي موتری «ویتز» روسوملی یېنگیل موتر بیلن تۉقنه‌شگن. عاقبتده یېنگیل موترده بۉلگن سکّیز نفر یۉلاوچی، جمله‌دن، بیر عیال، اوچ اېرکک و تۉرت نفر باله هلاک بۉلگن.
غزنی ولایتیده‌گی طالبلر محلي مسووللری هم اوشبو حادثه یوز بېرگنینی تصدیقله‌گن، بیراق اونینگ سببیگه ایضاح بېرمه‌گن.
بلخ ولایتیده اېسه ایکّیته علیحده ترافیک حادثه‌سی عاقبتیده تۉرت کیشی هلاک بۉلگن، ینه بېش کیشی جراحتلنگن.
بلخ ولایتیده‌گی طالبلر امنیه قوماندانلیگی بیاناتیده اوشبو ترافیک حادثه‌لری تیناوون (سه‌شنبه، ۱۲عقرب) بلخ–کابل قتناوو یۉلیده همده مزار شریف شهریده صادر بۉلگنی معلوم قیلینگن.
بیاناتده‌گی معلوماتلرگه کۉره، بیرینچی حادثه بلخ–کابل موتر یۉلیده ایکّی دانه «سویفت» روسوملی موترنینگ تۉقنه‌شیشی عاقبتیده یوز بېرگن. نتیجه‌ده اوچ کیشی هلاک بۉلگن، ینه تۉرت کیشی جراحتلنگن.
ایکّینچی ترافیک حادثه‌سی مزار شریف شهری‌نینگ دشت شور حدودیده «سویفت» روسوملی موتر نینگ تیلری یوک مو‌ترسی بیلن تۉقنه‌شیشی عاقبتیده صادر بۉلگن. اوشبو حادثه‌ده بیر عیال هلاک بۉلگن.
ترافیک حادثه‌لریگه هیداوچیلر نینگ یوقاری تېزلیکده حرکتلنیشی و احتیاطسیزلیگی سبب بۉلگنی ایتیلماقده.
