بیرلشگن ملتلر تشکیلاتی‌نینگ باش کاتبی مخصوص وکیلی و افغانستانده‌گی بیرلشگن ملتلر تشکیلاتی یاردم (یوناما) رهبری رباب فاطمه افغانستان و پاکستان اۉرته‌سیده‌گی چېگره‌لرنینگ یاپیلیشی سودا-ساتیق نینگ ایزدن چیقیشیگه، اهالی و تجارلر فعالیتیگه ضرر یېتکزه‌یاتگنینی ایتدی.
یقینده افغانستان نینگ شرقیده‌گی ننگرهار ولایتیگه بارگن یوناما باشلیغی بوگون (چهارشنبه، ۱۳ عقرب) نشر قیلینگن ویدیو مراجعتیده اهالی نینگ تورلی قتلملری، جمله‌دن، خصوصي سکتور وکیللری و قبیله آقسقاللری بیلن اوچره‌شگنینی ایتدی.
اونینگ قۉشیمچه قیلیشیچه: «همه جایده وضعیت بیر خیل: سودا-ساتیق ایزدن چیققن، بیزنس ضرر کۉرگن، ایشسیزلیک حقیقتاً هم آرتیب بارماقده و قشّاقلیک کوچه‌یماقده».
بیرلشگن ملتلر تشکیلاتی‌نینگ افغانستانده‌گی یاردم اداره‌سی باشلیغی اوشبو وضعیتگه «یېچیم تاپیشیمیز کېره‌ک»، دېیه تأکیدله‌دی.
پاکستان قریب بیر ییل اوّل طالبلر بیلن ضدیت و کېلیشماوچیلیکلر کوچه‌یگنیدن سۉنگ افغانستان بیلن برچه قوروقلیکده‌گی چېگره اۉتیش پونکتلرینی یاپگن اېدی.
چېگره‌لرنینگ یاپیلیشی ایکّی مملکت اۉرته‌سیده‌گی سودا-ساتیق و برچه تورده‌گی قوروقلیک قتناولری نینگ دېیرلی تۉلیق توختشیگه سبب بۉلدی. بو اېسه چېگره‌‌نینگ هر ایکّی تامانیده یشاوچی اهالیگه کتّه اقتصادي ضرر یېتکزدی.
یوناما باشلیغی شونینگدېک، تورخم بارگنینی، قَیتیب کېلووچیلرنی قۉللب-قوّتلش مرکزلرینی کۉزدن کېچیرگنینی و وطنگه قَیتگنلر بیلن اوچره‌شگنینی ایتدی.
قَیتیب کېلووچیلرگه کۉرسه‌تیله‌یاتگن یاردم حقیده گپیرر اېکن، او شونده‌ی دېدی: «بیز نینگ مسوولیتیمیز فقط قَیتیب کېلووچیلرنی باش‌پناه، آزیق-طعام و شاشیلینچ حمایه یاردمی بیلن تأمینلش بیلن‌گینه چېکلنمه‌یدی. بلکه اوزاق مدتلی یېچیملرنی تاپیش اوستیده هم ایشلشیمیز کېره‌ک».
رباب فاطمه قَیتیب کېلووچیلرنینگ ینگی شرایطگه ماسلشیش یۉلیده‌گی سعی-حرکتلری، شونینگدېک، محلي اهالی‌نینگ اولرنی مهمان‌دۉستلیک بیلن کوتیب آلگنی اوچون منّتدارلیک بیلدیردی.
بو رباب فاطمه نینگ یوناما باشلیغی و بیرلشگن ملتلر تشکیلاتی باش کاتبی‌نینگ افغانستان بۉییچه مخصوص وکیلی لوازمیگه کیریشگنیدن کېین مملکت ولایتلریدن بیریگه قیلگن ایلک سفری بۉلدی.
بنگلادش فقراسی بۉلگن اوشبو دیپلومات قریب اوچ هفته اوّل کابلگه کېلگن و بمت نینگ افغانستانده‌گی یاردم اداره‌سی باشلیغی صفتیده ایش باشله‌گن اېدی.
