«چېگره بیلمس خبرچیلر» تشکیلاتی طالبلر استخباراتی‌نینگ «۰۱۵» ناملی مخصوص بۉلیمی موجودلیگینی معلوم قیلدی. اوشبو بۉلیم خادملری ژورنالیستلرنی کوزه‌تیب باره‌دی، اولرنی سۉراققه چقیره‌دی، تهدید قیله‌دی و اَیریم حاللرده حبسگه آلیب، قییناققه ساله‌دی.
مذکور تشکیلات چهارشنبه کونی (۱۳عقرب) نشر قیلگن تېرگاو گزاریشده «۰۱۵» بۉلیمی نینگ مقصدی مستقل ییتکرمه فعالیتینی توخته‌تیش و طالبلرنینگ اۉز قره‌شلرینی مجبورن سینگدیریشدن عبارت اېکنینی بیلدیرگن.
«چېگره بیلمس خبرچیلر» اۉز تدقیقاتلری نتیجه‌لریگه ته‌یه‌نیب، اوشبو بۉلیم اجتماعي ترماقلرنی کوزه‌تیش، شونینگدېک، طالباننی قۉللب-قوّتلش و اونینگ مخالفلریگه قرشی ترغیبات کمپنیلرینی تشکیل اېتیش بیلن هم شغللنیشینی معلوم قیلگن.
تشکیلات انیقلشیچه، «۰۱۵» بۉلیمی ۲۰۲۱-ییل اگوست آییدن بویان طالبلر استخبارات عمومی اداره‌سی ترکیبیده فعالیت یوریته‌دی همده کابل و ولایتلرده اۉز خادملریگه اېگه.
تشکیلات معلوماتیگه کۉره، اوشبو بۉلیم خادملری ییتکرمه فعالیتینی کوزه‌ته‌دی، طالبلر نقطهٔ نظریدن مامقبول بۉلگن ماتریاللرنی انیقله‌یدی و تنقیدي فکر بیلدیرگن ژورنالیستلرنی سۉراق قیلیش اوچون چقیره‌دی. اونینگ تېزکار گروهی بعضاً «امر به معروف و نهي از منکر» وزیرلیگی بیلن همکارلیکده ییتکرمه اداره‌لریگه باستیریب کیریب، ژورنالیستلرنی حبسگه آله‌دی و اولر نینگ جهازلرینی مصادره قیله‌دی.
«چېگره بیلمس خبرچیلر» طالبلر نینگ ۲۰۲۶-ییل می آییده «طلوع نیوز» تلویزیونی همده ۲۰۲۵-ییل جولای آییده بیر قطار مېدیا تشکیلاتلری اداره‌لریگه اویوشتیرگن باسقینلرینی مثال قیلیب کېلتیرگن.
تشکیلات نینگ بیلدیریشیچه، ۲۰۲۱-ییلدن بویان افغانستانده ۷۷ نفر ژورنالیست حبسگه آلینگن. اولر نینگ حبسده سه‌قلنیش مدتی بیر هفته‌دن ایکّی ییلگچه دوام اېتگن.
اوشبو تشکیلات بیلن مستعار آستیده صحبتلشگن اوچ نفر ژورنالیست «۰۱۵» بۉلیمی و طالبلر استخباراتی‌نینگ باشقه توزیلمه‌لریده حبسگه آلینیشی همده قییناققه سالینیشی بیلن باغلیق تجربه‌لرینی حکایه قیلگن.
ژورنالیستلردن بیری فرهادنینگ ایتیشیچه، او حبسگه آلینگنیدن سۉنگ، خادملر اونینگ باشیگه قاره قاپ کيدیریب، کابلده‌گی استخبارات اداره‌سیگه آلیب باریشگن.
او «جاسوسلیک» و «اسلام امیرلیگیگه قرشی ترغیبات آلیب باریش»ده عیبلنگن. بیر نېچه کوندن سۉنگ اېسه «۰۱۵» بۉلیمیگه اۉتکزیلیب، ایکّی هفته دوامیده کیچیک کامره‌ده سه‌قلنگن.
فرهاد شونده‌ی دېگن: «عیناً شو یېرده باشقه جایلرگه قره‌گنده کۉپراق قییناققه سالیندیم».
اونینگ سۉزلریگه کۉره، خادملر کېچه-یو کوندوز اونی سۉراق قیلیب، باشقه ژورنالیستلر نینگ اسملرینی آشکار اېتیشنی طلب قیلیشگن. فرهاد بېل و آیاقلریگه کلتک بیلن اوریلگنی، برق‌قه بېرووچی شاک قوریلمسی قۉللنگنینی ایتگن. شونینگدېک، او هنوز قییناقلر نینگ عاقبتلریدن اذیت چېکه‌یاتگنینی بیلدیرگن.
تلویزیونلردن بیری نینگ سابق ژورنالیستی احمد نینگ ایتیشیچه، ییتکرمه‌گه باسیم اَیریم کۉرسه‌توولر نینگ تعقیقلنیشی و عیال ژورنالیستلر نینگ فعالیتدن چېتله‌تیلیشی بیلن باشلنگن.
اونینگ سۉزلریگه کۉره، ییتکرمه اره‌لش دستورلرنی نشراتگه اوزه‌تمسلیک و طالبلر مخالفلری بیلن اینتېرویو تشکیل اېتمسلیک حقیده مجبوري روشده کفالت بېریشگه مجبور قیلینگن.
احمد طالبلر اوچون مامقبول بۉلگن رایورتاژلری سببلی بیر نېچه بار استخبارات نینگ «۰۱۵» بۉلیمیگه چقیریلگن.
اونینگ ایتیشیچه، بیر سفر اونی مجبورن اوشبو اداره‌گه آلیب باریشگن و «جاسوسلیک»ده عیبلشگن. اونی شو قدَر قتّيق قییناققه سالیشگنکی، کوچلی ضربه‌لر عاقبتیده هوشیدن کېتگن.
احمد، شونینگدېک، بیر سفر تونگی ساعت ۲:۰۰ ده خادملر اونی تېپه‌لیککه آلیب چیقیب، پېشانه‌سیگه قورال تیره‌گنی و اۉزیگه اۉخشه‌گن آدملر شو یېر نینگ اۉزیده اۉلدیریلگنینی ایتیب، تهدید قیلگنینی حکایه قیلگن.
کېینچه‌لیک او طالبلرگه قرشی ترغیبات آلیب باریشده عیبلنیب، قماققه تشلنگن. احمد بگرام قماقخانه‌سیده هم محبوسلر نینگ قۉل-آیاقلری باغلنیشی و ساووق سوو بیلن جزالنیشیگه گواه بۉلگنینی ایتگن.
عبدالله نینگ سۉزلریگه کۉره، طالبان خادملری اوندن عیاللر حقوقلری، خوفسیزلیک بیلن باغلیق واقعه‌لر و قشّاقلیک حقیده رایورتاژ تیارله‌مسلیکنی، عکسینچه، طالبلر طرفدارلرینی کۉرسه‌توولرگه تکلیف قیلیشنی طلب قیلیشگن.
اونینگ ایتیشیچه، طالبلر خادملری اونگه: «بیز تامانده بۉلگن آدملرنی تکلیف قیلیشینگ کېره‌ک، ملي منفعتلرگه قرشی چیقه‌دیگنلرنی اېمس»، دېب ایتیشگن.
«چېگره بیلمس خبرچیلر» ژورنالیستلرگه نسبتاً تهدیدلر اولر نینگ خارجده‌گی حیاتیده هم دوام اېته‌یاتگنینی تأکیدلب، اَیریملریگه: «قه‌یېرده بۉلسنگ هم، قه‌یېرگه یشیرینسنگ هم، سېنی تاپه‌میز»، دېب ایتیلگنینی قید اېتگن.
«چېگره بیلمس خبرچیلر» تشکیلاتی اوشبو تېرگاو دوامیده طالبان استخباراتی نینگ «۰۱۵» بۉلیمیده اجتماعي ترماقلر بیلن شغللنووچی علیحده توزیلمه هم بارلیگینی انیقله‌گن.
تشکیلات معلوماتیگه کۉره، اوشبو بۉلیمده اینتېرنېتده‌گی مطلب‌نی کوزه‌تیش بیلن شغللنووچی قِسم همده ترغیبات، یالغان معلوماتلرنی ترقه‌تیش و جماعتچیلیک فکریگه تأثیر کۉرسه‌تیش اوچون مسوول باشقه بیر قِسم موجود. شونینگدېک، اوشبو اداره‌ده ویدیولر تیارلش و حبسگه آلینگن شخصلردن مجبوري روشده اقرارلیک یازیب آلیش اوچون ستدیو هم بار.
«چېگره بیلمس خبرچیلر» نینگ یازیشیچه، ۲۰۲۶ییل سپتمبر آییده افغانستان نینگ خارجده‌گی اَیریم ییتکرمه‌لری طالبلر استخبارات عمومی اداره‌سی دن آلینگنی ایتیله‌یاتگن حجتلرنی اعلان قیلگن.
اوشبو حجتلرگه کۉره، تأثیر اۉتکزیش و ترغیبات دستورلری اوچون ۷۰.۷ میلیون افغاني، یعنی ۹۰۰مینگ یېورادن آرتیق مبلغ اجره‌تیش رېجه‌لشتیریلگن. شونینگدېک، طالبلر قره‌شلرینی ترغیب قیلیش و مخالفلرنینگ آبروسینی توشیریش مقصدیده قریب ۱ مینگ ۵۰۰ ته اجتماعي ترماق اکونتیدن فایده‌لنیله‌دی.
«چېگره بیلمس خبرچیلر» تشکیلاتی نینگ ایکس اجتماعي ترماغیده‌گی اوشبو اکونتلر پُستلری یوزه‌سیدن اۉتکزگن تحلیلی شونی کۉرسه‌تگنکی، اَیریم اکونتلر بیر خیل یاکه اۉخشه‌ش خبرلرنی بیر نېچه دقیقه فرق بیلن نشر قیله‌دی. بعضی اکونتلر اېسه عیال کیشی نینگ نامیدن یاکه اۉزینی پنجشېر ولایتی اهالیسی صفتیده تنیشتیرگن حالده فعالیت یوریته‌دی.
طالبلذ مطبوعات سوزلاوچیسی اۉرین‌باسری حمدالله فطرت «چېگره بیلمس خبرچیلر» تشکیلاتیگه بېرگن بیاناتیده «۰۱۵» بۉلیمی قانون اساسیده ایش یوریتیشینی همده «هېچ کیم اۉزباشیمچه‌لیک بیلن حبسگه آلینمسلیگی یاکه اونگه نسبتاً یامان مناسبتده بۉلینمه‌سلیگینی» ایتگن.
بیراق «چېگره بیلمس خبرچیلر» ژورنالیستلر نینگ حکایه‌لری، تشکیلات‌نینگ اۉز حجتلری و «انسان حقوقلری» خلق‌ارا انسان حقوقلری تشکیلاتی نینگ دلیللری طالبلرینگ رسمي بیاناتلریگه ضد اېکنینی تأکیدله‌گن.
