طالبلر تشقی ایشلر وزیرلیگی قطر پایتختی دوحه جریانی دایره‌سیده خصوصي سکتورنی قۉللب-قوّتلش و گیاهوند مادّه‌لر سوداسیگه قرشی کوره‌ش بۉییچه ایشچی گروهلر ییغیلیشی اۉزبېکستان نینگ ترمذ شهریده اۉتکزیله‌یاتگنینی معلوم قیلدی.
وزیرلیک بوگون (پنج‌شنبه، ۱۴عقرب) نشر قیلگن بیاناتیده اوشبو ییغیلیش طالبلر رسميلری، بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما)، دوحه جریانیگه اعضا دولتلر همده خصوصي سکتور وکیللری اشتراکیده تیناوون باشلنگنینی و بوگون هم دوام اېته‌یاتگنینی بیلدیردی.
طالبلر تشقی ایشلر وزیرلیگی‌نینگ معلوم قیلیشیچه، ییغیلیشده افغانستان قیشلاق خۉجه‌لیگی محصولاتلرینی صادر قیلیش اوچون ستندردلر، سېرتیفیکیتلر بېریش و تیارگرلیک مسأله‌لری، مقابل تیریکچیلیک منبعلری همده اینکلیوزیو اقتصادي اۉسیش محاکمه قیلینه‌دی.
وزیرلیک، شونینگدېک، اشتراکچیلر خصوصي سکتورنی مستحکملش، بازارلرگه چیقیش امکانیتلرینی کېنگه‌یتیریش و بو باره‌ده عملي همکارلیک یۉللری یوزه‌سیدن فکر المشیشینی قۉشیمچه قیلگن.
خصوصي سکتورنی قۉللب-قوّتلش و گیاهوند مادّه‌لرگه قرشی کوره‌ش بۉییچه ایشچی گروهلر بیرلشگن ملتلر تشکیلاتی‌نینگ نظارتی آستیده آلیب باریله‌یاتگن دوحه جریانی نینگ ۲۰۲۳ییلده‌گی اوچینچی ییغیلیشیده تشکیل اېتیلگن.
اوشبو گروهلر طالبلر نینگ گیاهوند مادّه‌لرگه قرشی کوره‌ش باره‌سیده‌گی مجبوريتلری، شونینگدېک، خلق‌ارا همجمعیت نینگ افغانستان خصوصي سکتورینی قۉللب-قوّتلش و دهقانلر اوچون مقابل اېکینلر یېتیشتیریش امکانیتلرینی یره‌تیش باره‌سیده‌گی مجبوريتلرینی کۉریب چیقه‌دی.
