فرانسه ملی مجلسی رئیسی یائل برون‌پیوه افغانستان عیاللریگه نسبتاً طالبلر سیاستینی جندر آپارتاید دېب اته‌ب، اونگه قرشی کوره‌شیش ضرورلیگینی تأکیدله‌دی.
او افغانستان نینگ سابق کانلر وزیری نرگس نهان بیلن اوچره‌شوویدن سۉنگ ایکس اجتماعي ترماغیده شونده‌ی یازدی: «افغانستانده عیاللر تیزیملی روشده جماعت حیاتیدن چېتلشتیریلماقده، اۉز حقوقلریدن محروم قیلینماقده و سکوت سقلشگه مجبور اېتیلماقده. بو تیزیملی سیاست نینگ اۉز نامی بار: جندر آپارتاید.
بونده‌ی وضعیتنی قبول قیلیب بۉلمه‌یدی و اونگه قرشی کوره‌شیش کېره‌ک».
یائل برون‌پیوه نرگس نهان بیلن جندر آپارتایدینی رسماً تن آلیش و اونگه قرشی چاره‌لر کۉریش ضرورتی حقیده شاشیلینچ روشده صحبتلشگنینی قۉشیمچه قیلگن.
نهان ایکس اجتماعي ترماغیده‌گی پُستیده فرانسه ملي مجلسی رئیسیگه افغانستان عیاللری‌نینگ جنسی آپارتایدنی انسانیتگه قرشی جنایت صفتیده تن آلیش و جنایي جوابگرلیککه تارتیش حقیده‌گی طلبینی قۉللب-قوّتله‌گنی اوچون منّتدارلیک بیلدیرگن.
او شونده‌ی دېگن: «بیز بو حقیقتنی تن آلیشنی عملي حرکتلرگه ایلنتیریشیمیز، عیاللرگه نسبتاً صادر اېتیله‌یاتگن بو اولکن عدالتسیزلیککه نام بېریلیشی، اونینگ تعقیقلنیشی و بونگه مسوول شخصلر جوابگرلیککه تارتیلیشینی تأمینلشیمیز کېره‌ک».
طالبلر حاکمیتگه قَیتگنیدن سۉنگ عیاللر و قیزلرگه نسبتاً کېسکین چېکلاولر جاري اېتگن. حاضرده افغانستان عیاللری و قیزلری تعلیم آلیش همده ایشلش حقوقیدن محروم اېتیلگن.
عیال فعاللر طالبلر نینگ بو سیاستینی جنسی آپارتاید دېب اته‌ب، اونی انسانیتگه قرشی جنایت صفتیده تن آلیشنی طلب قیلماقده.
خلق‌ارا جنایي محکمه طالبلر یېتکچیسی هبت‌الله آخوندزاده، اوشبو گروه عالي محکمه رئیسی همده تعلیم و عالي تعلیم وزیرلریگه عیاللر و قیزلرگه نسبتاً چېکلاولر جاري اېتیش آرقه‌لی انسانیتگه قرشی جنایت صادر اېتگنلیکده عیبلب، حبسگه آلیش اوچون اۉردر بېرگن.
