فرانسه تشقی ایشلر وزیرلیگی طالبلر بیلن حجتسیز افغانستانلیک مهاجرلرنی دېپورت قیلیش مسأله‌سیده آلیب باریله‌یاتگن تخنیکي مذاکره‌لر «بو رژیمینی تن آلیش دېگنی اېمس»، دېب بیانات بېردی.
فرانسيه اخبارات آژانسی خبریگه کۉره، اوشبو وزیرلیک مطبوعات سوزلاوچیسی پاسکال کنفاورو شونده‌ی دېگن: «فرانسه طالبلرنی تن آلمه‌یدی و اولرنی تن آلیش نیتیده هم اېمس. بو تخنیکي ملاقات هېچ قنده‌ی حالتده اوشبو رژیمنی تن آلیش دېگنی اېمس».
اونینگ قۉشیمچه قیلیشیچه، اَیریم فرانسه ییتکرمه‌لریده ترقه‌لگن خبرلردن فرقلی اۉله‌راق، «بوگون پاریس‌ده‌گی افغانستان قنسوللیگیده طالبان هیئتی موجود اېمس»
فرانسه اخبارات آژانسی اکتوبر آیی باشیده ایلک بار فرانسه‌لیک دیپلوماتیک منبعگه ته‌یه‌نیب، فرانسه افغانلرنی دېپورت قیلیشنی «آسانلشتیریش» مقصدیده طالبلر حکومتی بیلن مذاکره‌لرنی باشله‌گنی حقیده خبر بېرگن اېدی.
فرانسه ایچکی ایشلر وزیری دوشنبه کونی بو مسأله‌نی تصدیقله‌دی.
فرانسه طالبلر حکومتینی رسماً تن آلمه‌یدی و او بیلن دیپلوماتیک علاقه‌لرگه اېگه اېمس.
شونگه قره‌مه‌ی، فرانسه آلمان بلجیم و سویس کبی اروپا اتفاقیگه اعضا قریب۲۰ دولتگه قۉشیلیب، افغانلرنی، خصوصاً، محکمه‌لر تامانیدن حکم قیلینگن شخصلرنی مملکتگه قَیتریش جریانینی تېزلشتیریشگه حرکت قیلماقده.
جون آییده بروکسلده طالبلر هیئتی همده اروپا اتفاقیگه اعضا ۱۵دولت رسميلری اۉرته‌سیده بۉلیب اۉتگن اوچره‌شوو بیر قطار انسان حقوقلری تشکیلاتلری و اروپا پارلمانی نینگ سۉل قناتیگه منسوب اَیریم وکیللر نینگ کېسکین تنقیدیگه اوچره‌گن اېدی. مذاکره‌لرده ناقانوني مهاجرت‌گه قرشی کوره‌شیش و مهاجرلرنی دېپورت قیلیشنی کۉپه‌یتیریش مسأله‌لری محاکمه قیلینگن.
بیرلشگن ملتلر تشکیلاتی‌نینگ انسان حقوقلری بۉییچه عالي کمیساری فالکېر تورک سپتمبر آییده خلق‌ارا همجمعیت نینگ افغانستانده‌گی انسان حقوقلری بخرانینی تاباره آغیرلشیب باره‌یاتگنیگه نسبتاً سکوت سه‌قله‌یاتگنینی تنقید قیلگن و افغان مهاجرلرینی مجبوري روشده اۉز مملکتیگه قَیتریشنی توخته‌تیشگه چقیرگن اېدی.
طالبلر افغانستان وطندالری‌نینگ حقوق و اېرکینلیکلریگه نسبتاً کېسکین چېکلاولر جاري قیلگن. اوشبو گروه قیزلر نینگ آلتینچی صنفدن یوقاری تعلیم آلیشینی تعقیقله‌گن.
خلق‌ارا جنایي محکمه طالبلر یېتکچیسی هبت‌الله‌آخوندزاده، عالي محکمه رئیسی همده اوشبو گروه نینگ تعلیم و عالي تعلیم وزیرلریگه نسبتاً عیاللر و قیزلر نینگ حقوقلرینی چېکلش آرقه‌لی انسانیتگه قرشی جنایت صادر اېتگنلیک عیبلاوی بیلن حبسگه آلیش اۉردرلرینی چیقرگن.
