پاکستان تشقی ایشلر وزیرلیگی امریکا حکومتی نینگ افغانستان وطنداشلرینی پاکستان آرقه‌لی دېپورت قیلیش حقیده‌گی تکلیفینی کۉریب چیقه‌یاتگنینی معلوم قیلدی. بو بیانات امریکا فدرا‌ل محکمه‌سی شو هفته نینگ باشیده اۉنلب افغان فقرالرینی باشقه دولتگه کۉچیریش رېجه‌سینی توخته‌تگنیدن سۉنگ ینگره‌دی.
پاکستان تشقی ایشلر وزیرلیگی مطبوعات کاتبی سجاد حیدرخان بوگون (جمعه، ۱۵ عقرب) هفته‌لیک مطبوعات انجمنیده: «عینِ پیتده بو مسأله کۉریب چیقیلماقده و اونگه علاقه‌دار برچه جهتلر تېگیشلی تامانلر بیلن مصلحتلشگن حالده سینچیکلب بهالنماقده»، دېدی.
او اۉنلب افغانشتانلیکلر نینگ دېپورت قیلینیشی حقیده‌گی خبرلر یوزه‌سیدن بېریلگن سوالگه جوابه‌ن: «ایکّی تامان اوچون هم مقبول بۉلگن یېچیم تاپیلیشیگه امید قیله‌میز»، دېیه قۉشیمچه قیلدی.
امریکا فدرا‌ل محکمه‌سی سه‌شنبه کونی افغانستانلیک مهاجرلرنینگ دېپورت قیلینیشیگه تۉسقینلیک قیلدی.
اۉتگن هفته امریکا عامه‌وي اخبارات واسطه‌لری ۱۵۰نفردن آرتیق افغانستان فقراسی امریکادن پاکستان آرقه‌لی افغانستانگه دېپورت قیلینیشی رېجه‌لشتیریله‌یاتگنی حقیده خبر بېرگن اېدی. بو حرکت دونالد ترامپ نینگ مهاجرت‌نی چېکلشگه قره‌تیلگن سۉنگگی کېسکین سیاستی دایره‌سیده عملگه آشیریلیشی ایتیلماقده.
امریکا نینگ سابق افغان اتفاقچیلرینی قۉللب-قوّتلاوچی «افغان ایواک» تشکیلاتی خبریگه کۉره، دېپورت قیلینیشی رېجه‌لشتیریلگنلر آره‌سیده کابل قوله‌شیدن آلدین امریکا حربي کوچلری بیلن همکارلیک قیلگن افغان فقرالری نینگ عایله اعضالری هم بار.
پاکستان حکومتی جاري ییل باشیده مملکت خوفسیزلیک کوچلریگه بوتون پاکستان بۉیلب ویزه‌سیز یورگن افغانستان فقرالرینی حبسگه آلیش حقیده کۉرسه‌تمه بېرگن اېدی.
بو چاره افغانستان مهاجرلرینی مجبوري روشده آرتگه قَیتریش سیاستی نینگ بیر قِسمی حسابلنه‌دی. مذکور سیاست نتیجه‌سیده اۉنلب ییللر دوام اېتگن اوروشلر سببلی اۉز مملکتینی ترک اېتگن میلیونلب افغانستانلیکلر آرتگه قَیتیشگه مجبور بۉلدی.
افغانستانده‌گی طالبلر رسميلری دوشنبه کونی امریکا نینگ افغان فقرالرینی دېپورت قیلیش رېجه‌لری یوزه‌سیدن خواطر بیلدیرگن اېدی.
طالبلر تشقی ایشلر وزیرلیگی امریکادن افغان مهاجرلرینی پاکستانگه دېپورت قیلمسلیکنی، بلکه پُخته اۉیلنگن و مسوولیتلی یاندشوو اساسیده بو گروه بیلن بې‌واسطه کېلیشووگه اېریشیشنی سۉردی.
