امریکا مدافعه وزیری پیت هگیست امریکا وکیللر مجلسی تامانیدن اۉزیگه نسبتاً استیضاح اعلان قیلیش تشبثینی «بېمعنی تماشا» و «سیاسي اۉیین» دېب اتهدی.
امریکا مدافعه وزیری بوگون (سهشنبه، ۱۹ عقرب) پنناگونده بۉلیب اۉتگن مطبوعات انجمنیده سۉزلر اېکن، اوشبو تشبث امریکا حربي خدمتچیلریگه اولرنینگ خدمت فعالیتی «جنایت» بۉلگن دېگن خبرنی یېتکزیشینی ایتدی.
پیت هیگیست، شونینگدېک، بو تشبث امریکانینگ دشمنلریگه، جملهدن ایرانگه، «قۉشمه ایالتلر قانوني حربي عملیاتلرنی موفقیتلی عملگه آشیرگنی اوچون اۉز جنگچیلری و حربي رهبرلرینی جزالهیدی»، دېگن خبرنی بېریشینی تأکیدلهدی.
او قۉشیمچه قیلدی: «بو وطنپرورلیک اېمس، بو قۉپارووچیلیکدیر».
هیگست اۉزی رهبرلیک قیلگن حربي عملیاتلر، جملهدن ایرانگه قرشی هجوم حقیده گپیرر اېکن، «اولرنی عملگه آشیرگنیمدن فخرلنهمن و ضرورت توغیلسه، اېرتهگهیاق ینه تکرارلهیمن»، دېدی.
امریکا وکیللر مجلسینینگ جمهوریتچی اعضاسی تاماس مسسی کېچه پیت هیگست نسبتاً استیضاح اعلان قیلیش تۉغریسیدهگی تکلیفنی کانگرسگه تقدیم اېتدی.
مذکور تکلیفده هیگست، جملهدن، ایرانگه قرشی اوروشنی رسماً اوروش اعلان قیلمسدن و کانگرس رخصتینی آلمهسدن باشقرگن، تصدیقلهگن همده دوام اېتتیرگنلیکده عیبلنگن.
شونینگدېک، او امریکا حربي کوچلریدن تینچ اهالی آرهسیدهگی قربانلر سانینی امکان قدَر کمهیتیریشنی طلب قیلووچی قانونلرنی بوزگنلیکده عیبلنماقده. بو عیبلاو اوروشنینگ بیرینچی کونیده امریکا و اسرایل هجومیگه اوچرهگن «میناب» قیزلر مکتبیگه قیلینگن ضربه بیلن باغلیق. ایران رسميلری معلوماتیگه کۉره، اوشبو هجوم عاقبتیده ۱۶۰ دن آرتیق اۉقووچی هلاک بۉلگن.
پیت هیگست نینگ مطبوعات انجمنیدن سۉنگ دونالد ترامپ اونی حمایه قیلیب، تاماس مسسینی «آمدسیز» دېب اتهدی.
امریکا وکیللر مجلیسیدهگی دموکراتلر اوزاق وقتدن بېری پیت هیگستگه نسبتاً استیضاح اعلان قیلیشگه اورینیب کېلماقده. اېندیلیکده دموکراتلر امریکا وکیللر مجلسی و سناده کۉپچیلیکنی تشکیل اېتگنی سببلی، هیگستگه نسبتاً استیضاح تکلیفینینگ معقوللنیش احتمالی هم آشگن.
