امریکا اوردوسی مرکزي قوماندانلیگی (سنتکام) قوماندانی برد کوپر قطرگه سفری چاغیده اوشبو مملکت باش وزیرینینگ اۉرینباسری و مدافعه وزیری شیخ سعود بن عبدالرحمان آل ثانی بیلن اوچرهشیب، مذاکرهلر اۉتکزدی.
قطر مدافعه وزیرلیگی بوگون (شنبه، ۳۰ عقرب) نشر قیلگن بیاناتیده ایتیلیشیچه، اوچرهشووده ایکّی تامان «اۉزارا منفعتلرگه دخلدار بیر قطار مسألهلر، شونینگدېک، ایکّی مملکت اۉرتهسیدهگی همکارلیکنی مستحکملش و کېنگهیتیریش یۉللرینی بحث قیلگن».
قطر مدافعه وزیرلیگی اوشبو اوچرهشوو حقیده باتفصیل معلومات بېرمهگن. امریکا وردوسی مرکزي قوماندانلیگی هم حاضرگچه بو بارهده هېچ قندهی ایضاح بیلدیرمهگن.
مذکور تشریف قطر سۉنگگی پیتلرده امریکا و ایران اۉرتهسیده واسطهچیلیک قیلیش بارهسیدهگی سعی-حرکتلرینی کوچهیتیرگن بیر پیتده عملگه آشیریلدی.
جاري آینینگ باشیده قطر رسميلری امریکا و ایران اۉرتهسیدهگی اوروشنی توگهتیش مقصدیده تېهرانگه سفر قیلدی. شوندن سۉنگ اولر اېران رسميلری بیلن بیرگهلیکده دحهگه یۉل آلدی و او یېرده ینه ایکّی کون مذاکرهلر آلیب باردی.
اوشبو مذاکرهلرده معین کېلیشووگه اېریشیلمهگن بۉلسه-ده، ایران رسميلری اولرنی ایجابي بهالهدی. اولر یکوني کېلیشووگه اېریشیش امریکا ایران نینگ شرطلرینی قبول قیلیشیگه باغلیقلیگینی تأکیدلهدی.
بوندن تشقری، قطر باش وزیری هم جاري آیده واشنگتن سفر قیلیب، آق اویده امریکا جمهور رییسی دونالد ترامپ بیلن اوچرهشدی. اوشبو اوچرهشوودن سۉنگ ترامپ ایرانگه قرشی ینگی هجوملر اویوشتیریش نیتیده اېمسلیگینی معلوم قیلدی.
