طالبلرنینگ تشقی ایشلر وزیرلیگی روسيه باش وزیری نینگ اۉرینباسری الکسی اورچوک اېرتهگه (پنجشنبه، ۲۱ عقرب) یوقاری مرتبهلی هیئتگه باشچیلیک قیلگن حالده کابلگه سفر قیلیشینی معلوم قیلدی.
حاضرده طالبلر نظارتی آستیده بۉلگن افغانستان ملي تلویزیونی طالبلر تشقی ایشلر وزیرلیگی مطبوعات سوزلاوچیسی اۉرینباسری ضیا احمد تکلگه تهیهنیب یازیشیچه، اوشبو سفردن مقصد افغانستان و روسيه اۉرتهسیدهگی اقتصادي و سودا همکارلیگینی کېنگهیتیریش، سرمایه کیریتیش امکانیتلرینی اۉرگنیش همده قۉشمه اقتصادي لایحهلر یوزهسیدن مذاکرهلر اۉتکزیشدن عبارت.
تیناوون هم روسيهنینگ افغانستان بۉییچه مخصوص وکیلی ضمیر کابلوف کابلده طالبلر تشقی ایشلر وزیری امیرخان متقی بیلن اوچرهشیب، ایکّی تامانلهمه علاقهلرنی، جملهدن، سودا-اقتصادي مناسبتلرنی رواجلنتیریش مسألهلرینی محاکمه قیلگن اېدی.
روسيه نینگ مخصوص وکیلی ۲۵-میزانده جمعی خوفسیزلیک شرطنامهسی تشکیلاتی ییغیلیشیده اوشبو مملکت باش وزیری اۉرینباسری هیئتگه باشچیلیک قیلیب، کابلگه سفر قیلیشینی ایتگن اېدی.
اونینگ قۉشیمچه قیلیشیچه، مذکور تشریف روسيه و افغانستان اۉرتهسیدهگی سودا-اقتصادي همکارلیککه قرهتیلهدی.
حاضرده روسيه دنیاده طالبلر حکومتینی افغانستانده رسماً تن آلگن یگانه دولت حسابلنهدی. اوشبو مملکت طالبلر بیلن اقتصادي، سودا و خوفسیزلیک ساحهلریدهگی همکارلیکنی کېنگهیتیریشگه اینتیلماقده.
روسيه رسميلری افغانستانده ترورچی گروهلر موجودلیگی و اولرنینگ مرکزي آسیاگه کیریب باریشی احتمالیدن بیر نېچه بار خواطر بیلدیرگن.
