ایراننینگ سیستان و بلوچستان ولایتیگه عاید خبرلرنی یاریتووچی «حالوش» اخبارات آژانسی اران حکومتی گیاهوند مادّهلر بیلن باغلیق جنایتلرده عیبلنگن افغانستان وطنداشینی اعدام اېتگنینی معلوم قیلدی.
«حالوش» نینگ یازیشیچه، شخصی عبدالله جلالي اېکنی انیقلنگن اوشبو شخص نینگ اۉلیم جزاسی چهارشنبه کونی (۲۷-جوزا) تانگده زاهدان مرکزي قماقخانهسیده اجرا اېتیلگن.
نشرنینگ قۉشیمچه قیلیشیچه،۲۵یاشلی عبدالله جلالي اویلنگن بۉلیب، ایکّی فرزندنینگ آتهسی اېدی. او اصلیده نیمروز ولایتینینگ خاشرو اولساللیگیده یشهگن.
معلوم قیلینیشیچه، او تۉرت ییل اوّل، اتیگی۲۱ یاشیده، زاهدان شهریده گیاهوند مادّهلر بیلن باغلیق جنایتلر بۉییچه عیبلاولر بیلن حبسگه آلینیب، اۉلیم جزاسیگه حکم قیلینگن اېدی.
ایران محکمهسی حاکمیتی و دولت عامهوي اخبارات واسطهلری حاضرچه اوشبو قتل یوزهسیدن هېچ قندهی معلومات بېرمهگن.
هر ییلی ایرانده اۉنلب افغانستانلیک اعدام اېتیلهدی. اولرنینگ اکثریتیگه قۉییلگن عیبلاولر گیاهوند مادّهلر بیلن باغلیق اېکنی ایتیلهدی.
یقینده طالبان تشقی ایشلر وزیرلیگی ایراندن افغانستانگه کۉچیریلگن۱۶۵ نفر محبوس آرهسیده اۉلیم جزاسیگه حکم قیلینگن بیر عیال و سکّیز اېرکک هم بارلیگینی معلوم قیلگن اېدی. اولرنینگ اۉلیم جزاسی عفو اېتیلیب، اوزاق مدتلی قماق جزاسی بیلن المشتیریلگنی بیلدیریلگن.
