طالبلر باش وزیری نینگ اقتصادي مسأله‌لر بۉییچه اۉرین‌باسری عبدالغنی برادر بیرلشگن ملتلر تشکیلاتی‌نینگ افغانستانده‌گی اداره‌سی (یوناما) نینگ انسان حقوقلری حالتی بۉییچه ینگی گزارشینی تنقید قیلیب، «یوناما تامانیدن نشر قیلینه‌یاتگن گزارشلرده افغانستان‌نینگ اقتصادي و خوفسیزلیک ساحه‌لریده‌گی یوتوقلرینی اعتباردن چېتده قالدیریش عدالتدن اېمس»، دېب ایتدی.
طالبلر باش وزیری نینگ اقتصادي مسأله‌لر بۉییچه اۉرین‌باسری بوگون (یک‌شنبه، ۲۶ میزان) کابلده‌گی مراسمده سۉزله‌گن نطقیده یوناما «قره‌مه-قرشی و دشمن تامان کبی» فقط «سلبي جهتلر»گه اعتبار قره‌ته‌‌یاتگنینی ایتدی.
او یونامادن «افغانستان‌نینگ واقعلیکلرینی انابتگه آلگن حالده، تحلیلي گزارشلرنی خالصانه نشر قیلیش»نی سۉره‌دی.
یونامانینگ انسان حقوقلری بۉلیمی اۉزی نینگ ینگی گزارشیده طالبلر تامانیدن صادر اېتیلگن انسان حقوقلری بوزیلیشی‌نینگ کۉپلب حالتلرینی حجتلشتیرگن. جمله‌دن، سۉنگگی اوچ آی دوامیده طالبلرنینگ امر به معروف و نهی از منکر خادملری تامانیدن عیاللر و اېرککلرنینگ ۴۳۳ته «اۉزباشیمچه‌لیک بیلن حبسگه آلینیشی و اوشلب توریلیشی» حالتینی قید اېتگن.
یوناما شونینگدېک، طالبلرنینگ امر معروف و نهی از منکر خادملری اېرکک محرمیسیز کېلگن عیاللرنینگ طبیات مرکزلری و دوکانلرگه کیریشیگه تۉسقینلیک قیلگن حالتلرنی هم حجتلشتیرگنینی بیلدیرگن.
بوندن آلدین طالبلر مطبوعات سوزلاوچیسی ذبیح‌الله مجاهد هم اوشبو گزارشگه مناسبت بیلدیریب، گروه نینگ امر به معروف و نهی از منکر خادملری تامانیدن عملگه آشیریلگن حبسلر «اۉزباشیمچه‌لیک بیلن» اېمسلیگینی، بلکه «عملده‌گی قانون-قاعده‌لر اساسیده، شریعتگه ضد خطی-حرکتلر نینگ آلدینی آلیش و شخصلرنی اصلاح قیلیش مقصدیده» عملگه آشیریلگنینی ایتگن اېدی.
طالبلر بوندن آلدین هم بیرلشگن ملتلر تشکیلاتی‌نینگ افغانستان‌ده انسان حقوقلری کېنگ مقیاسده بوزیله‌یاتگنی حقیده‌گی گزارشلرینی رد اېتیب، اولرنی اۉزیگه قرشی «پروپاگنده» دېب اته‌گن.
شونگه قره‌مه‌ی، اوشبو گروه سۉنگگی بېش ییلدن آرتیق وقت دوامیده افغانستان فقرالری نینگ، جمله‌دن، عیاللر و قیزلرنینگ اساسي حقوقلرینی کېنگ مقیاسده بوزیشده عیبلنیب کېلماقده. خلق‌ارا جنایي محکمه اېسه گروه‌نینگ تۉرت نفر منصبدار شخصیگه، جمله‌دن، اونینگ رهبریگه «جندر اساسیده‌گی انسانیتگه قرشی جنایت» صادر اېتگنلیکده عیبلنیب، حبسگه آلیش قرارینی چیقرگن.
