طالبلر تشقی ایشلر وزیری امیرخان متقي گروه باش وزیری اۉرینباسری عبدالغنی برادر بیلن بیرگه ایران نینگ سابق رهبری علی خامنهای نینگ دفن مراسمیده اشتراک اېتیش اوچون تهرانگه باریب، ایران تشقی ایشلر وزیری عباس عراقچی بیلن اوچرهشوو اۉتکزدی.
ایران تشقی ایشلر وزیرلیگی بیاناتیگه کۉره، اوچرهشوو بوگون (پنجشنبه، ۱۱-سرطان) توشدن کېین بۉلیب اۉتگن.
اونده امیرخان متقي علی خامنهای و ایران نینگ ینه بیر قطار یوقاری مرتبهلی رسمیلری اۉلدیریلیشی مناسبتی بیلن همدردلیک بیلدیریب، «اېران رهبریتی، دولتی و خلقیگه غلبه همده موفقیت تیلهگن».
ایران تشقی ایشلر وزیرلیگی قۉشیمچه قیلیشیچه، متقي، شونینگدېک، «امریکا و صهیونیستلر تامانیدن ایرانگه قرشی عملگه آشیریلگن وحشیانه تجاوزنی قارهلب، ایران خلقی نینگ باسقینچیلرگه قرشی متانتی و قرشیلیگینی تحسینگه سزاوار همده عبرتلی دېب بهالهگن.
او برچه اسلام مملکتلری امریکا- صهیونیستلر فتنهلرگه قرشی بیردم بۉلیشی ضرورلیگینی تأکیدلهگن».
بیاناتگه کۉره، عباس عراقچی طالبان هیئتسی نینگ دفن مراسمیدهگی اشتراکینی یوقاری بهالب، «افغانستان رسميلری، خلقی، علمالری و ضیالیلری نینگ همدردلیک اظهارلری همده ایرانگه قرشی تجاوزنی قارهلهگن بیاناتلری اوچون منّتدارلیک بیلدیرگن».
عبدالغنی برادر باشچیلیگیدهگی، امیرخان متقي هم اشتراک اېتگن طالبان هیئتی بوگون علی خامنهای نینگ دفن مراسمیده قتنهشیش اوچون کابلدن تهرانگه جۉنهب کېتدی.
خبرگه کۉره، علی خامنهاینینگ دفن مراسمی کېلهسی هفته شنبه کونی تهرانده باشلنهدی و کېلهسی هفته پنجشنبه کونی مشهدده دفن اېتیلیشی رېجهلشتیریلگن.
