طالبلرنینگ ساغلیقنی سقلش وزیری نور جلال جلالی روسيه هیئتی بیلن اوچره‌شووده بو دولتدن ساغلیقنی سقلش ساحه‌سیده، خصوصاً، طبیات خادملری قابلیتینی آشیریش باره‌سیده همکارلیک قیلیشنی سۉره‌گن. به
طالبلرنینگ ساغلیقنی سقلش وزیرلیگی بوگون (یک‌شنبه، ۲۶-میزان) ترقه‌تگن بیاناتیده جلالی روسيه هیئتی و اوشبو مملکت نینگ کابل‌ده‌گی اېلچیخانه‌سی وکیللری بیلن اوچره‌شگنینی معلوم قیلگن.
بیاناتگه کۉره، طالبلر وزیری و روسيه هیئتی «ساغلیقنی سقلش ساحه‌سیده‌گی ایکّی تامانله‌مه همکارلیکنی کېنگه‌یتیریش، خصوصاً، افغانستان طبیات خادملری‌نینگ سرطان همده یوره‌ک-قان تامیر کسللیکلرینی تشخیصلش و دوالش بۉییچه قابلیتینی آشیریش» مسأله‌لرینی محاکمه قیلگن.
نورجلال جلالی طبي خدمتلر صفتینی یخشیلش اوچون ملَکه‌لی کادرلرنی تیارلش مهم‌لیگینی تأکیدلب، ایکّی دولت اۉرته‌سیده «تجربه، مخصوص بیلیم و کۉنیکمه‌لر المشینووی»نی یۉلگه قۉییشنی سۉره‌گن.
طالبلرنینگ ساغلیقنی سقلش وزیرلیگی روسيه هیئتی ساغلیقنی سقلش ساحه‌سیده‌گی قۉشمه همکارلیکنی کېنگه‌یتیریش باره‌سیده «تیارلیگی و قۉللب-قوّتلشینی» بیلدیرگنینی ایتگن.
طالبلر و پاکستان اۉرته‌سیده اوروش باشلنگنیدن سۉنگ، طالبلر دارو-درمان و طبي احتیاجلرنی تأمینلش اوچون منطقه‌ده‌گی بیر نېچه دولتگه مراجعت قیلگن. جمله‌دن، روسيه‌نینگ «فارماسنتیز» فارماسیون کمپنیسی اوشبو گروه بیلن همکارلیک قیلیشگه تیارلیگینی بیلدیرگن.
