بنگلادش دیپلوماتی رباب فاطمه بیرلشگن ملتلر تشکیلاتی باش کاتبی‌نینگ افغانستان بۉییچه ینگی مخصوص وکیلی و بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) باشلیغی صفتیده رسماً اۉز ایشینی باشله‌دی.
یوناما بوگون (یک‌شنبه، ۲۶-میزان) بیانات بېریب، رباب فاطمه کابلگه یېتیب کېلگنی و اۉز وظیفه‌سینی بجریشگه کیریشگنینی معلوم قیلدی.
او ۲۰۲ص-ییل سپتامبردن ۲۰۲۵-ییل سپتاملرگچه یوناماگه باشلیغ قیلگن قیرغیزستانلیک سیاستچی و دیپلومات رزا اوتنبایوا اۉرنینی اېگه‌لله‌دی.
یوناما معلوماتیگه کۉره، رباب فاطمه «ملي و خلق‌ارا درجه‌ده‌گی دولت خدمتلری، ایکّی و کۉپ تامانله‌مه دیپلوماتيک، سیاست ایشلب چیقیش، ترغیبات، شونینگدېک، دستورلرنی رېجه‌لشتیریش و عملگه آشیریش» ساحه‌لریده ۳۰ ییلدن آرتیق ایش تجربه‌سیگه اېگه.
یوناما بیاناتیده ایتیلیشیچه، او افغانستانده‌گی یاردم اداره‌سی رهبری اېتیب تعیینلنیشیدن اوّل «بیرلشگن ملتلر تشکیلاتی باش کاتبی‌نینگ اۉرین‌باسری همده اېنگ کم رواجلنگن مملکتلر، دېنگیزگه چیقیش امکانیگه اېگه بۉلمه‌گن رواجلنه‌یاتگن مملکتلر و کیچیک آرال رواجلنه‌یاتگن دولتلر بۉییچه بیرلشگن ملتلر تشکیلاتی‌نینگ یوقاری درجه‌ده‌گی وکیلی» لوازمیده ایشله‌گن.
رباب فاطمه، شونینگدېک، ۲۰۱۹–۲۰۲۲-ییللرده بنگلادش نینگ بیرلشگن ملتلر تشکیلاتی‌ده‌گی اېلچیسی و دایمي وکیلی بۉلگن. بو لوازمده او بیرلشگن ملتلر تشکیلاتی‌نینگ باله‌لر جمغرمه‌سی (یونیسف) اجرائیه کېنگشیگه ۲۰۲۰-ییلده، بیرلشگن ملتلر تشکیلاتی‌نینگ عیاللر تشکیلاتی اجرائیه کېنگشیگه ۲۰۲۲-ییلده رئیسلیک قیلگن. شونینگدېک، بیرلشگن ملتلر تشکیلاتی‌نینگ ترقیات دستوری (UNDP)بمت اهالیشناسلیک جمغرمه‌سی (UNFPA) و بمت لایحه‌لر خدمتلری باشقه‌رمسی (UNOPS) اجرائیه کېنگشلری رئیسی نینگ اۉرین‌باسری صفتیده فعالیت یوریتگن.
او ۲۰۲۲-ییلده بیرلشگن ملتلر تشکیلاتی‌نینگ تینچلیک اۉرنه‌تیش کمیسیونیگه رئیس اېتیب سه‌یلنگن ایلک عیال بۉلگن. شونینگدېک، بمت باش اسّمبلېیه‌سی نینگ ۷۷-سېسّیه‌‌سی رئیسی‌نینگ اۉرین‌باسری صفتیده هم فعالیت یوریتگن.
رباب فاطمه بیرلشگن ملتلر تشکیلاتی‌نینگ تیزیمیگه کیریشیدن اوّل ۲۰۱۶–۲۰۱۹-ییللرده بنگلادش‌نینگ جاپان‌ده‌گی اېلچیسی، ۲۰۱۵–۲۰۱۶-ییللرده اېسه بنگلادش تشقی ایشلر وزیرلیگی‌نینگ باش دیرېکتوری لوازمیده ایشله‌گن.
او بنگلادش نینگ نیویورک جینواده بیجینگ و کَلکته‌ده‌گی دیپلوماتیک وکالت‌خانه‌لریده، شونینگدېک، مملکت تشقی ایشلر وزیرلیگیده تورلی لوازملرده فعالیت یوریتگن.
او خلق‌ارا مهاجرت تشکیلاتیده هم ایشله‌گن همده لندنده‌گی همدۉستلیک مملکتلری کاتبیتی نینگ انسان حقوقلری بۉلیمیگه رهبرلیک قیلگن.
اونینگ آنه تیلی بنگل تیلی بۉلیب، انگلیس تیلیده هم سۉزلشه‌دی، هند و اوردو تیللرینی هم بیله‌دی.
رباب فاطمه یوناماگه افغانستان‌ده طالبان عیاللر حقوقلریگه قۉییلگن چېکلاولرنی کوچه‌یتیریب، عیاللر و قیزلرنی مملکتده‌گی جماعت حیاتیدن بوتونله‌ی چیقریب تشلشگه اورینه‌یاتگن بیر پیتده رهبرلیک قیلماقده.
اونینگ سَلفی رزا اوتنبایوانینگ فعالیتی کېنگ تنقیدلرگه اوچره‌گن. بیر قطار عیاللر و انسان حقوقلری فعاللری اونی طالباننی «آقلش»ده عیبله‌گن اېدی.
