افغانستان سابق پارلمانی اعضاسی فوزيه کوفي بدخشان ولایتینینگ یفتل پایین اولسواللیگیده یوز بېرگن واقعهلردن سۉنگ طالبلر تینچ اهالینی، جملهدن بالهلرنی حبسگه آلیشنی باشلهگنینی ایتدی.
کوفي طالبلر تامانیدن بیر نېچه یاش ییگیتنینگ حبسگه آلینهیاتگنی عکس اېتگن ویدیونی ایکس اجتماعي ترماغیده اولشیب، شوندهی یازدی:
«طالبلر بوگون اېرتهلب بدخشان ولایتینینگ یفتل پایین اولسواللیگی قولهگنی بیلن باغلیق، دېگن تخمین بیلن تینچ اهالینی، جملهدن بالهلرنی حبسگه آلیشنی باشلهدی.»
اونینگ تأکیدلشیچه، طالبلر «عادي یشاوچیلرنی حبسگه آلیش و باستیریش»نی باسیم واسطهسی صفتیده قۉلهماقده. کوفي آگاهلنتیریب، شوندهی دېدی: «اولر خلقنی قنچهلیک کۉپراق باستیرسه، اېرکینلیککه بۉلگن ایستک و اراده شونچهلیک کوچلیراق بۉلهدی.»
افغانستاننینگ تاجیکستاندهگی اېلچیسی ظاهر اغبر هم «سپاهيان میهن» جبههسینینگ یفتل پایینگه اویوشتیرگن هجومینی طالبلر باسیم سیاستینینگ عاقبتی دېب بهالهدی.
او ایکس اجتماعي ترماغیده: «خلق نینگ طالبان ظلمیگه صبری توگهگنی بوگون بدخشاننینگ یفتلیده نمایان بۉلدی»، دېب یازدی.
سابق جمهوریت دیپلوماتی هجومنی عملگه آشیرگنلرنی وطنپرورلر دېب اتهب، اولر «بو کاغذ یۉلبرسنینگ حقیقي قیافهسینی» آچیب بېرگنی و بدخشان همده افغانستانده ینگی باسقیچنی باشلب بېرگنینی تأکیدلهدی.
اغبر ینه: «قارانغولیک بغریده بیرته شمع نینگ اۉزی هم یېترلی»، دېدی.
طالبلر اېسه یفتل پایین اولسواللیک مرکزیگه اویوشتیریلگن هجومده قتنشگنلیکده گمان قیلینگن بیر نېچه شخص قۉلگه آلینگنینی ادعا قیلماقده.
ترقهلگن ویدیوده (اونینگ قندهی شرایطده یازیب آلینگنی نامعلوم) عادي کییمدهگی بیر نېچه یاش ییگیت «الدنگنلیکلرینی»، یفتل پایین اولسواللیگی مرکزیگه هجوم قیلگنلیکلرینی و کېینچهلیک طالبان کوچلری تامانیدن قۉلگه آلینگنلیکلرینی اَیتماقده.
بیراق هجوم اوچون مسوولیتنی اۉز ذمّهسیگه آلگن و بوگون تانگده (جمعه، ۲۶-سرطان) یفتل پایین اولسواللیگی مرکزیده اۉز بیراغینی کۉترگن «سپاهيان میهن» جبههسی اۉز اعضالریدن هېچ بیری حبسگه آلینمهگنینی معلوم قیلگن.
