خلق ارا مهاجرت تشکیلاتی و بیرلشگن ملتلر تشکیلاتینینگ گیاهوند مادّهلر و جنایتچیلیک بۉییچه ادارهسینینگ معلوم قیلیشیچه، افغانستانگه قَیتگن عایلهلرنینگ۵۶ فایزی اساسي یشش خرجتلرینی قاپلهی آلمهیپتی همده قرض یاکه مالی یاردمگه تهیهنماقده.
اوشبو ایکّی تشکیلات بوگون (پنجشنبه، ۸-اسد) بوتون جهان آدم سوداسیگه قرشی کورهش کونی مناسبتی بیلن اعلان قیلگن قۉشمه بیاناتیده، قَیتگن عایلهلرنینگ بېقرار اقتصادي احوالی اولرنی آدم سوداسی و استثمار خوفی آلدیده ینه-ده ضعیفلشتیرهیاتگنینی تأکیدلهدی.
بیاناتده شوندهی دېییلهدی: «قَیتگنلرنینگ برقرارلیک درجهسی بۉییچه اۉتکزیلگن قیسقه تحلیل شونی کۉرسهتهدیکی، اولرنینگ اتیگی ۱۱ فایزی ایش بیلن بند یاکه اۉز تجارتیگه اېگه. بیراق۵۶ فایزی اېسه اېنگ ضرور حیاتي احتیاجلرینی هم قاپلهی آلمهیدی.»
بیرلشگن ملتلر تشکیلاتیگه قرهشلی اوشبو ایکّی تشکیلاتنینگ بیلدیریشیچه، بهالنگن قَیتگنلرنینگ قریب یرمی امان قالیش اوچون قرض یاکه مالی یاردمگه تهیهنماقده.
اولرنینگ قید اېتیشیچه، عایلهلرنینگ بېقرار اقتصادي احوالی آدم سوداسی و تورلی کۉرینیشدهگی استثمارگه دچار بۉلیش خوفینی آشیرماقده.
بوگون، ۳۰-جولای، بوتون جهان آدم سوداسیگه قرشی کورهش کونی صفتیده نشانلنهدی.
خلق ارا مهاجرت تشکیلاتیده همده بیرلشگن ملتلر تشکیلاتینینگ گیاهوند ماده لر و جنایتچیلیککه قرشی کورش تشکیلاتی آدم سوداسینینگ آلدینی آلیش، آدم سوداگرلریگه قرشی کورهشیش همده جبرلنگنلرگه یاردم کۉرسهتیش بۉییچه موافقلشتیریلگن سعی-حرکتلرنینگ اهمیتینی تأکیدلهگن.
بیاناتده ایتیلیشیچه، افغانستاندهگی بحرانلر، جملهدن قۉشنی دولتلردن مجبوري دېپورتلر، کۉکنار یېتیشتیریشگه اساسلنگن قیشلاق درآمدلری نینگ کمهییشی، گومانیتار یاردم نینگ کېسکین قیسقریشی، طبيعي آفتلر همده عیاللر و قیزلر حقوقلریگه قۉییلگن دواملی چېکلاولر آدملرنینگ آدم سوداسی و استثمارگه نسبتاً ضعیفلیگینی کوچهیتیرماقده.
تشکیلاتلر قید اېتیشیچه، قَیتگنلر موجود بحرانلر سببلی خوفلی ایشلرگه، مجبوري محنتگه، جنسي استثمارگه، قوللیککه اۉخشش شرایطلرگه، حتا اۉز تنه اعضالرینی ساتیشگه مجبور بۉلیش خوفی آستیده قالماقده.
بیاناتده ینه شوندهی دېییلهدی: «بعضی قَیتگنلر تیلنچیلیک، مجبوري نکاح، بالهلرنی یاللش، جنسي استثمار یاکه ناقانوني فعالیتلرگه جلب اېتیلیش آرقهلی سوءاستعمال قیلینماقده.»
بیرلشگن ملتلر تشکیلاتینینگ گیاهوند و جنایتچیلیککه قرشی کورهش بۉلیمی باشلیغی پولیک اوک سری نینگ ایتیشیچه، «حاضرگی باسیملر افغانستان فقرالرینی آدم سوداسی و استثمار آلدیده ینه-ده ضعیفلشتیرماقده.»
اونینگ قۉشیمچه قیلیشیچه، کۉپلب قَیتگنلر مملکتگه جوده چېکلنگن امکانیتلر بیلن کیریب کېلماقده و تیریکچیلیک، اوی-جای همده اساسي خدمتلردن فایدهلنیشده جدّي معمالرگه دوچ کېلماقده.
باشقه تاماندن خلق ارا مهاجرلر ایشلر بۉییچه تشکیلاتنینگ افغانستاندهگی وکالتخانهسی باشلیغی میهیونگ پارک اېسه قَیتگنلر و اولرنی قبول قیلهیاتگن محلي جماعهلرنی قۉللب-قوّتلشگه چقیریب، بو نهفقط گومانیتار ضرورت، بلکه افغانستان برقرارلیگیگه قرهتیلگن مهم سرمایه اېکنینی تأکیدلهدی.
