طالبلر ایچکی ایشلر وزیرلیگی فراه ولایتی مرکزیده‌گی صرافلیک دوکانیدن قریب اوچ میلیون افغاني نقد پول اۉغیرله‌گنلیکده گمان قیلینه‌یاتگن تۉرت کیشی نینگ حبسگه آلینگنینی معلوم قیلدی.
طالبلر ایچکی ایشلر وزیرلیگی بوگون، شنبه، ۲۵ میزان اعلان قیلگن بیاناتیده ایتیلیشیچه، اوشبو اۉغریلر ایکّی کون اوّل فراه ولایتی مرکزیده‌گی بیر صرافلیک دوکانیدن ۲ میلیون ۹۶۰مینگ افغاني پولنی اۉغیرله‌گن.
بیاناتگه کۉره، طالبلرنینگ فراه‌ده‌گی خوفسیزلیک قوماندانلیگی اوشبو گروه نینگ استخبارات اداره‌سی بیلن همکارلیکده کوزه‌توو کامره‌لریده‌گی تصویرلرنی تېکشیرگنیدن سۉنگ اۉغریلرنی انیقله‌گن. نتیجه‌ده اولرنینگ ایکّی نفری فراه‌دن، ینه ایکّی نفری اېسه هراتدن قۉلگه آلینگن.
اۉغیرلنگن پوللردن ۲ میلیون ۳۷۶ مینگ افغاني و بیر ته کرولا موتری گمانلنووچیلردن انیقلنیب، مصادره قیلینگن.
طالبلر ایچکی ایشلر وزیرلیگی حبسگه آلینگن شخصلر دستلبکی تېرگاودن سۉنگ محکمه و عدلیه اۉرگانلریگه تاپشیریلیشینی بیلدیرگن.
طالبلر حاکمیتگه کېلگنیدن کېینگی سۉنگگی بېش ییل دوامیده صرافلیک و زرگرلیک دوکانلریده‌گی اۉغریلیکلر حقیده کۉپراق خبرلر ترقه‌لماقده. اوشبو حادثه‌لردن ترقه‌لگن اَیریم تصویرلرده عکس اېتیشیچه، اکثریت حاللرده اۉغریلر قوراللنگن بۉلیب، کوندوز کونی گروه بۉلیب حرکت قیلگن.
