بیرلشگن ملتلر تشکیلاتینینگ افغانستاندهگی یاردم ادارهسی (یوناما) سرپرستی جورجیت گانیون، ینه بیر بار قیزلر مکتبلرینی قَیته آچیش و قیزلرنینگ برچه تعلیم باسقیچلریگه هېچ قندهی چېکلاوسیز کیریشینی تأمینلشگه چقیردی.
یوناما جمعه کونی (۹اسد) اعلان قیلگن ویدېو گزارشیده معلوم قیلیشیچه، جورجیت گانیون، یقینده کابل نینگ استالیف اولسواللگیده تشریفی چاغیده قیزلر باشلنغیچ مکتبیگه باریب، قیزلر تعلیمی یۉلیدهگی چېکلاولرنی بېکار قیلیش ضرورلیگینی تأکیدلهگن.
او تشریف دوامیده بیرلشگن ملتلر تشکیلاتی ترقیات دستوری کۉمهگیده کامپیوترلر بیلن جهازلنگن قیزلر مکتبینی هم کۉزدن کېچیرگن.
معلومات و فناوری تکنالوژيلریدن فایدهلنیش مهملیگینی تأکیدلهگن جورجیت گانیون، طالبان رسميلرینی موجود چېکلاولرنی بېکار قیلیشگه همده افغانستان قیزلریگه برچه باسقیچلرده تعلیم آلیش امکانینی بېریشگه چقیردی.
طالبلر افغانستانده حاکمیتنی قَیته اېگهلهگنیدن سۉنگ قیزلر نینگ ۶صنفدن یوقاری باسقیچلرده اۉقیشینی تعقیقلهگن. حاضرده فقط باشلنغیچ قیزلر مکتبلری فعالیت یوریتماقده، عیاللر و قیزلر اېسه اۉرته، عالي تعلیم همده بیلیم یورتلردن چېتلشتیریلگن.
یونیسف معلوماتیگه کۉره، حاضرده 2،5 میلیوندن آرتیق افغانستان قیزلری اوشبو چېکلاو سبب تعلیم آلیش امکانیدن محروم. اگر وضعیت اۉزگرمسه، بو رقم ۲۰۳۰-ییلگه باریب۴ میلیونگه یېتیشی کوتیلماقده.
