نیمروز ولایتیدهگی طالبلر والیسینینگ مطبوعات سۉزلاوچیسی عبدالمتوکل توحیدی ناقانوني روشده ایرانگه کېتهیاتگن پیتده بېدرَک یۉقالگن ۱۴ییگیتنینگ جسدلری تاپیلگنینی معلوم قیلدی.
توحیدی بوگون (جمعه، ۹ اسد) عامهوي اخبارات واسطهلریگه بېرگن معلوماتیده، جسدلر «لالو قوملیکلری» حدودیدن تاپیلگنینی ایتدی.
اونینگ سۉزلریگه کۉره، بو ییگیتلر تخمیناً ایکّی هفته اوّل ایرانگه ناقانوني یۉل بیلن کېتهیاتگن۱۹ کیشیلیک گروه ترکیبیده بۉلیب، نیمروز چۉللریدهگی قوملی حدودده یۉلدن ادهشیب قالگن.
اولرنینگ بېش نفری جسدی اۉتگن شنبه (۲۷سرطان) کونی «مارگو» چۉلیدن تاپیلگن اېدی.
معلوم قیلینیشیچه، اولر آچلیک، چنقاقلیک، جزیرهمه ایسّیق و کۉچووچی قوملر آرهسیده قالیب کېتگنی عاقبتیده هلاک بۉلگن.
واقعه جاییدن ترقهتیلگن صورهتلرده ییگیتلر حیاتی نینگ سۉنگگی لحظهلریده یاغاچ بۉلهکلری و کییم پرچهلریدن فایدهلنیب، باشلریگه سایه قیلیش اوچون باشپناه یهسهشگه اورینگنینی کۉریش ممکن.
اولر نینگ جسدلری کۉچووچی قوملر آرهسیده یاتگن بۉلیب، تنهلری نینگ اَیریم قِسملرینی قوم باسیب قالگن.
رسمي انیق معلومات موجود بۉلمهسه-ده، اوّل هم ایرانگه ناقانوني یۉل بیلن اۉتیشگه اورینگن افغانستان فقرالری نینگ هلاک بۉلیشی بیلن باغلیق کۉپلب حالتلر قید اېتیلگن.
متخصصلر افغانستانده قشّاقلیک و ایشسیزلیک نینگ کوچهییشی همده عادي فقرالر اوچون ایران ویزهلرینینگ قانوني بېریلیشی تۉختهتیلگنی یاشلر نینگ ناقانوني یۉللر آرقهلی ایرانگه کېتیشگه اورینهیاتگنی نینگ اساسي سببلریدن بیری اېکنینی تأکیدلهماقده.
