پاکستاندهگی طبي تعلیمنی نظارت قیلووچی اۉرگان افغانستان بیلیم یورتلرینینگ طبیات و ستوماتلوژی فاکولتهلرینی تماملهگن بیتیرووچیلر اېندیلیکده پاکستانده داکترلیک لیتسېنزيهسینی آلیش اوچون مجبوري امتحانده قتنهشه آلمهسلیگینی معلوم قیلدی. اوشبو قرار افغانستانده تحصیل آلهیاتگن یوزلب پاکستانلیک طلبهلر تقدیریگه تأثیر کۉرسهتیشی کوتیلماقده.
عرب نیوز خبریگه کۉره، پاکستان طبیات و ستوماتلوژی کېنگشی (پیام و دیسی) 31-جولای کونی اعلان قیلگن بیلدیریشنامهده، فقط خارجي طبیات بیتیرووچیلری تعلیم کمیسیونسی (ایسیافامجی) تامانیدن تصدیقلنگن خارجي طبیات عاليگاهلرینی تماملهگن پاکستان فقرالریگینه ملي رۉیخطدن اۉتیش امتحانی (انآرای) ده قتنهشیشی ممکنلیگینی بیلدیرگن. اوشبو امتحاندن اۉتیش پاکستانده طبي فعالیت یوریتیش اوچون مجبوري شرط حسابلنهدی.
کېنگش نینگ تأکیدلشیچه، افغانستاندهگی طبیات و ستوماتلوژی عالي تعلیم مؤسسهلری تامانیدن تصدیقلنگن مؤسسهلر رۉیخطیگه کیرمهیدی. شو سببلی اولر نینگ دیپلوملری تن آلینمهیدی.
شونینگدېک، کېنگش افغانستانده تحصیل آلهیاتگن پاکستانلیک طلبهلرگه اۉقیشنی دوام اېتتیریش یاکه اېتتیرمسلیک مسألهسیده قرارنی تۉلیق خبردار حالده قبول قیلیشنی توصیه اېتیب، بو بارهده هېچ قندهی استثنا یاکه امتیاز بېریلمسلیگینی تأکیدلهدی.
اوشبو کېینگش کاتبی ریحان نقوی دوشنبه کونی عرب نیوزگه بېرگن صحبتیده شوندهی دېدی: «قرار شوندن عبارتکی، طلبهلر فقط کېنگش نینگ رسمي وبسایتیده رۉیخطگه کیریتیلگن یونیورسیتیلرده تحصیل آلیشلری کېرهک. افغانستان اېسه عموماً بو رۉیخطده موجود اېمس.»
عرب نیوز نینگ یازیشیچه، اوشبو قرار اېنگ اوّلا افغانستانده طبیات یۉنهلیشیده اۉقياتگن پاکستانلیک طلبهلرگه، اینیقسه خیبر پختونخوا ایالتیدن بۉلگن طلبهلرگه جدّي تأثیر قیلهدی. کۉپلب عایلهلر پاکستاندهگی طبیات یونیورسیتیلریده اۉرینلر چېکلنگنی، اۉقیش نرخی نینگ یوقاریلیگی و افغانستان نینگ جیوگرافیک یقینلیگی سببلی فرزندلرینی افغانستانگه اۉقیشگه یوبارگن.
پاکستان تشقی ایشلر وزیرلیگی معلوماتیگه کۉره، حاضرده افغانستانده تورلی یۉنهلیشلرده تحصیل آلهیاتگن پاکستانلیک طلبهلر سانی بیر مینگ 300 نفرگه یقین.
بیراق کابلدهگی اسپینغر طبیات بیلیم یورتی طلبهسی و کابلدهگی پشتون طلبهلر اویوشمهسی رئیسی احسان الودود بو رقمنی رد اېتدی. اونینگ ایتیشیچه، فقط افغانستان طبیات فهکولتهتلری نینگ اۉزیده 6 مینگدن آرتیق پاکستانلیک طلبه تحصیل آلماقده، ینه 4 مینگگه یقین طلبه اېسه الّهقچان بیتیرگن.
اونینگ سۉزلریگه کۉره، کېنگش نینگ سۉنگگی قراری مینگلب طلبهلر و بیتیرووچیلرنی ناانیق حقوقي وضعیتگه سالیب قۉیگن.
احسان الودودنینگ ایتیشیچه، طلبهلر اوّلراق پېشاور عالي محکمه سیده اۉز فایدهسیگه قرار چیقرگن اېدی. اما کېنگش اوشبو قرار اوستیدن فدرال کانستیتوتسیهوي محکمه سیگه شکایت قیلگن و ایش هنوز کۉریب چیقیلماقده.
او ینه شوندهی دېدی: «مذکور ایش حلی فدرال کانستیتوتسیهوي محکمه ده کۉریب چیقیلهیاتگن بۉلسه-ده، کېنگش بیر بیلدیریشنامه چیقردی. بو خارجده، اینیقسه افغانستانده طبیات و ستوماتلوژی یۉنهلیشیده تحصیل آلگن بیتیرووچیلرگه جوده کتّه تأثیر کۉرسهتماقده.»
شونینگدېک، اونینگ تأکیدلشیچه، محکمه جریانی حلی یکونلنمهگن مسأله بۉییچه ینگی بیلدیریشنامه نینگ چیقریلیشی و اجرا اېتیلیشی عدالت تمایللری همده حقوقي انیقلیک یوزهسیدن جدّي سواللرنی یوزهگه کېلتیرماقده.
