بیرلشگن ملتلر تشکیلاتی‌نینگ باله‌لر جمغرمه‌سی (یونیسف) و «آچلیککه قرشی حرکت» تشکیلاتی افغانستانده اۉتکیر تۉییب طعاملنمسلیک حالتی تاباره آغیرلشه‌یاتگنیدن آگاهلنتیردی. تحلیللرگه کۉره، ۲۰۲۷-ییلده ۴ میلیوندن آرتیق باله دوالنیشگه محتاج بۉله‌دی. بو سۉنگگی بېش ییل ایچیده قید اېتیلگن اېنگ یوقاری کۉرسه‌تکیچدیر.
مذکور آگاهلنتیریش آزیق-طعام خوفسیزلیگینی انتیگراسیون‌لشگن تصنیفلش تیزیمی نینگ اېنگ ینگی تحلیلیگه اساسلنگن.
تحلیلگه کۉره، آزیق-طعام تقچیللیگی دوریده — نوامبردن اپرېلگچه، یعنی بوتون قیش موسمینی قمره‌ب آلووچی دورده — افغانستان اهالیسی‌نینگ قریب ۱۹.۲ میلیون نفری، یعنی اهالی نینگ ۳۸ فایزی یوقاری درجه‌ده‌گی اۉتکیر آزیق-طعام خوفسیزلیگی معماسیگه دوچ کېلیشی کوتیلماقده.
آزیق-طعام خوفسیزلیگی نینگ اېنگ آغیر درجه‌لری بدخشان، بادغیس، دایکندی، غور، سمنگان، سرپل ولایتلری همده غزنی ولایتی نینگ قیشلاق حدودلریده کوزه‌تیلیشی تحلیل قیلینماقده.
تحلیلگه کۉره، اۉته آغیر درجه‌ده‌گی تۉییب طعاملنمسلیک حالتیگه دوچ کېله‌یاتگن ولایتلر سانی ۲۰۲۵-ییلده‌گی ۷ ته‌دن ۲۰۲۶-ییلده ۱۰ تگه آشگن. بو کۉرستکیچ ۲۰۲۷-ییلده ۱۴تگه یېتیشی کوتیلماقده. بو اېسه افغانستان ولایتلری‌نینگ اوچدن بیریدن کۉپراغینی تشکیل اېته‌دی.
آزیق-طعام خوفسیزلیگینی انتیگراسیون‌لشگن تصنیفلش تیزیمی تحلیلی شونی کۉرسه‌ته‌دیکی، اۉتکیر تۉییب طعاملنمسلیک نینگ اېنگ آغیر شکلی هم اېنگ تېز سرعتلرده آرتیب بارماقده.
تحلیللرگه کۉره، ۲۰۲۷-ییلده قریب ۱.۰۹ میلیون باله آغیر درجه‌ده‌گی اۉتکیر تۉییب طعاملنمسلیکدن اذیت چېکه‌دی. بو ۲۰۲۶-ییلگه نسبتاً ۱۶ فایزگه کۉپدیر. شونینگدېک، قریب ۳ میلیون باله‌ده اۉرته‌چه درجه‌ده‌گی اۉتکیر تۉییب طعاملنمسلیک کوزه‌تیلیشی کوتیلماقده.
بوندن تشقری، قریب ۱.۳ میلیون حامله‌دار یاکه اېمیزیکلی عیال هم تۉییب طعاملنمسلیکدن اذیت چېکیشی کوتیلماقده.
بیرلشگن ملتلر تشکیلاتی‌نینگ تأکیدلشیچه، تۉییب طعاملنمسلیک حالتلری آرتیب باره‌یاتگنیگه قره‌مه‌ی، اونینگ آلدینی آلیش و دوالش خدمتلری احتیاجلردن انچه آرتده قالماقده. بو، اینیقسه، عیاللر و باله‌لرنی ینه‌ده کتّه خوف آستیده قالدیرماقده.
بیرلشگن ملتلر تشکیلاتلری معلوماتیگه کۉره، تۉییب طعاملنمسلیک‌نینگ اېنگ یوقاری درجه‌سی افغانستان‌نینگ جَنوبي حدودلریده کوزه‌تیلماقده. بو حدودلرده احتیاجلرنینگ آرتیشی عایله‌لرگه کۉرسه‌تیله‌یاتگن موجود خدمتلر امکانیتلریدن آشیب کېتگن و باله‌لر، شونینگدېک، حامله‌دار همده اېمیزیکلی عیاللر تاباره کۉپراق حمایه‌سیز حالگه کېلماقده.
«آچلیککه قرشی حرکت» تشکیلاتی‌نینگ افغانستانده‌گی مدیری کوبی ریتولد شونده‌ی دېدی: «مېن یقینده افغانستان جَنوبیده‌گی هلمند ولایتیگه باردیم. او یېرده آزیقلنتیریش خدمتلری جوده کتّه باسیم آستیده قالگن. آغیر درجه‌ده‌گی تۉییب طعاملنمسلیکنی دوالش باله‌لر حیاتینی سه‌قلب قاله‌دی و بو همان جوده ضرور. اما باله حیاتی اوچون کوره‌شه‌دیگن حالتگه کېلگونچه کوتیب تورمسلیگیمیز کېره‌ک. حقیقي موفقیتنی آغیر درجه‌ده‌گی تۉییب طعاملنمسلیک‌نینگ آلدینی آلیشگه موفق بۉلگن باله‌لریمیز سانی بیلن اۉلچه‌شیمیز کېره‌ک. بو افغانستان باله‌لری اوچون ساغلام کېله‌جک سری آلیب باره‌دیگن یۉلدیر».
بیرلشگن ملتلر تشکیلاتی باش کاتبی نینگ انسانپرورلیک مسأله‌لری و فوق العاده یاردملر بۉییچه اۉرین‌باسری، شونینگدېک، بیرلشگن ملتلر تشکیلاتی‌نینگ گومانیتار مسأله‌لرنی موافقلشتیریش باشقرمه‌سی (اوچا) فوق العاده یاردملر کوریناتوری تام فچلر افغانستانده اۉتکیر تۉییب طعاملنمسلیک حالتی جاري موسم اوچون قید اېتیلگن اېنگ یامان درجه‌گه یېتگنینی ایتدی.
اونینگ قۉشیمچه قیلیشیچه، زودلیک بیلن چاره کۉریلمسه، وضعیت ینه‌ده آغیرلشه‌دی. بیرلشگن ملتلر تشکیلاتی‌نینگ رسميسی معماگه جواب چاره‌لرینی کۉریش اوچون یېترلی مبلغ اجره‌تیش ضرورلیگینی تأکیدله‌دی.
