اروپا اتفاقی‌نینگ افغانستان بۉییچه وکیلی توماس فریلیسن کابلگه قیلگن سفری‌نینگ یکونیده عیاللر و قیزلرگه قۉییلگن چېکلاولر «مناسبتلرنی نارمللشتیریش یۉلیده‌گی اساسي تۉسیقلردن بیری» اېکنینی ایتدی.
او سفر دوامیده طالبلر وکیللری، دیپلوماتیک همجعیت اعضالری، بیرلشگن ملتلر تشکیلاتی، اسلام همکارلیک تشکیلاتی وکیللری همده مدنی جماعه‌چیلیک فعاللری بیلن اوچره‌شدی.
اروپا اتفاقی‌نینگ کابلده‌گی وکالت‌خانه‌سی بیاناتیده ایتیلیشیچه، برچه اوچره‌شوو و مذاکره‌لرده افغانستانده‌گی انسان حقوقلری حالتی اساسي موضوعلردن بیری بۉلگن.
توماس فریلیسن طالبلر وکیللری بیلن اوچره‌شوولرده اروپا اتفاقی‌نینگ عیاللر و قیزلرگه نسبتاً جاري اېتیلگن چېکلاولر یوزه‌سیدن جدّي خواطرینی بیلدیرگن. او مذکور چېکلاولر مناسبتلرنی نارمللشتیریش یۉلیده‌گی اساسي تۉسیقلردن بیری اېکنینی تأکیدله‌گن.
طالبلر عیاللر و قیزلرنینگ حقوق و اېرکینلیکلریگه نسبتاً کېسکین چېکلاولر جاري قیلگن. بو گروه عیاللر و قیزلرنی تعلیم آلیش و ایشلش حقوقیدن محروم قیلگن همده اَیریم عیاللرنی کيینیش قاعده‌لرینی بوزگنلیکده عیبلب حبسگه آلماقده.
سۉنگگی بېش ییل دوامیده خلق‌ارا همجعیت عیاللر و قیزلرنینگ حقوقلرینی حرمت قیلیشگه چقیره‌یاتگنیگه قره‌مه‌ی، طالبلرنینگ چېکلاولری ینه-ده کوچه‌یگن.
اروپا اتفاقی‌نینگ کابلده‌گی نماینده‌لیگی بیاناتیده توماس فریلیسن طالبلر وکیللری بیلن اوچره‌شوولرده افغانستان و منطقه‌ده‌گی خوفسیزلیک حالتینی هم محاکمه قیلگنی قید اېتیلگن.
اروپا اتفاقی‌نینگ مخصوص وکیلی افغانستان و منطقه‌ده ترورچی گروهلرنینگ، جمله‌دن، «اسلامي دولت» گروهی‌نینگ خراسان بۉلینمه‌سی‌نینگ دایمي موجودلیگی و ترانسچېگره‌وي فعالیتیدن خواطر بیلدیرگن. او بو گروهلرنینگ فعالیتی منطقه، حتا منطقه‌دن تشقریده‌گی دولتلر خوفسیزلیگیگه هم تهدید سالیشی ممکنلیگیدن آگاهلنتیرگن.
او طالبلر افغانستان حدودیدن باشقه دولتلر خوفسیزلیگیگه قرشی فایده‌لنیلیشی‌نینگ آلدینی آلیش باره‌سیده‌گی مجبوريتلرینی بجریشی کېره‌کلیگینی تأکیدله‌گن.
اروپا اتفاقی‌نینگ مخصوص وکیلی طالبلرنینگ گیاهوند مادّه‌لر سوداسیگه قرشی کوره‌ش باره‌سیده‌گی سعی-حرکتلرینی آلقیشله‌گن، بیراق کۉکنارنی یېتیشتیریش ینه کۉپه‌یه‌یاتگنیدن خواطر بیلدیرگن.
او ضرر کۉرگن دهقانلر اوچون برقرار و مقابل درآمد منبعلرینی یره‌تیش ضرورلیگینی تأکیدله‌گن.
اروپا اتفاقی‌نینگ کابلده‌گی وکالت‌خانه‌سی‌نینگ معلوم قیلیشیچه، مخصوص وکیل منطقه دولتلری وکیللری بیلن اوچره‌شوولرده افغانستان و پاکستان اۉرته‌سیده‌گی خوفسیزلیک مسأله‌لریگه دایر خواطرلرنی محاکمه قیلیش اوچون ایکّی تامانله‌مه ملاقاتنی قَیته تیکلش ضرورلیگینی تأکیدله‌گن.
اروپا اتفاقی‌نینگ مخصوص وکیلی بیرلشگن ملتلر تشکیلاتی رهبرلیگیده افغانستان بیلن خلق‌ارا همکارلیکنی یۉلگه قۉییشگه قره‌تیلگن دوحه جریانینی قۉللب-قوّتلشینی ینه بیر بار بیلدیرگن.
او مذکور جریانده آلدینگه سیلجیش و افغانستان‌نینگ خلق‌ارا همجعیتگه قَیته انتیگراسیون‌لشووی اوچون خلق‌ارا همجعیت‌نینگ موافقلشتیریلگن و هم‌جهت یاندشووی، شونینگدېک، افغانستان نینگ عملده‌گی حکومت وکیللری‌نینگ کانتروکتیف اشتراکی ضرورلیگینی ایتگن.
او بو یۉلده‌گی ترقیات افغانستان‌نینگ خلق‌ارا مجبوريتلرینی عملده بجریشیگه باغلیقلیگینی تأکیدله‌گن. شونینگدېک، اینکلیوزیو باشقروو مهم‌لیگینی قید اېتگن.
اروپالیک رسمي اروپا اتفاقی افغانستان بیلن انیق تمایللر، عملي چاره‌لر و افغانستان خلقی‌نینگ احتیاجلریگه اعتبار اساسیده ملاقاتنی دوام اېتتیریشینی بیلدیرگن.
او طالبلر وکیللری و خلق‌ارا همکارلر بیلن اوچره‌شوولرده اقلیم اۉزگریشی مسأله‌سینی هم محاکمه قیلگن. فریلیسن اقلیم اۉزگریشی نینگ احتمالي سلبي عاقبتلری‌نینگ آلدینی آلیش یاکه اولرنی کمه‌یتیریش مقصدیده اقلیم بیلن باغلیق لایحه‌لرگه اوستوار اهمیت بېریشگه چقیرگن.
