کابلنینگ غربیدهگی «امید سبز» شهرچهسی اېگهسی محمد نبی خلیلي، طالبلر تامانیدن اوشبو شهرچه یېرلری «امیرلیک ملکی» دېب اعلان قیلینیب، اهالیگه کۉچیب چیقیش بویروغی بېریلگنیدن سۉنگ، طالبلرنینگ مخصوص محکمهسی قرارینی قَیته کۉریب چیقیش و حقوقي جهتدن سینچکاولیک بیلن قَیته تېکشیریشنی سۉردی.
خلیلي بوگون (چهارشنبه، ۱۴ اسد) فیس بوک صحیفهسیده اعلان قیلگن بیاناتیده شوندهی یازدی: «امید سبز شهرچهسی قانوني شریعت حجتلری، رسمي ملک حجتلری، وکالتلی ادارهلر تامانیدن تۉلیق تصدیقلنگن حجتلر و قوریلیش اوچون بېریلگن قانوني رخصتنامهلر اساسیده برپا اېتیلگن.»
اونینگ ایتیشیچه، شهرچهنی تشکیل اېتیش نینگ برچه باسقیچلری قانونگه رعایه قیلیش و ملک حقوقینی حرمت قیلیش مقصدیده عملگه آشیریلگن. مینگلب عایلهلر اوشبو حجتلرگه ایشانیب، عمر جمغرمهلرینی اوی-جای ساتیب آلیشگه صرفلهگن.
محمد نبی خلیلينینگ تأکیدلشیچه، شهرچه جایلشگن برچه یېرلر ییللر، حتا اولادلر دوامیده اوشبو یېرلرگه اېگهلیک قیلیب کېلگن، قانوني ملک حجتلریگه اېگه بۉلگن و اۉتگن اۉن ییللیکلردن بویان سالیق تۉلهب کېلگن شخصلردن ساتیب آلینگن.
شهرچه اېگهسی نینگ سۉزلریگه کۉره، طالبان مخصوص محکمهسی قرار چیقرگنیدن کېین مینگلب عایلهلر تقدیریدن چوقور خواطرلنگن بۉلسه-ده، جماعتچیلیک آرهسیده خواطر یاکه کېسکینلیک کېلتیریب چیقریشی ممکن بۉلگن هر قندهی حرکتدن تيیلگن.
او تنلهگن یۉل اېسه قوییدهگیلردن عبارت بۉلگن: قانونگه مراجعت قیلیش؛ رسمي اعتراض بیلدیریش؛ حجتلرنی قَیته کۉریب چیقیشنی سۉرهش؛ مسوول ادارهلر بیلن ملاقات قیلیش؛ ایشنی حقوقي جهتدن کوزهتیش اوچون شهرچه وکیللرینی یوباریش.
خلیلي ینه شوندهی دېدی: «تاریخي تجربهلر مېنگه خلق حقوقلرینی حمایه قیلیش نینگ یگانه یۉلی قانون، حجت و عدالتگه تهیهنیش اېکنینی اۉرگتگن. شو سببلی امید سبز شهرچهسی شریعت حجتلری، قانوني حجتلر و رسمي رخصتنامهلر اساسیده برپا اېتیلدی، تاکه هېچ کیم نینگ حقوقی پایمال قیلینمسین.»
اونینگ فکریچه، مذکور ایش فقط ایشانچلی حجتلر، شریعت تمایللری، حقوقي معیارلر و عدالتلی محکمه مېزانلری اساسیده کۉریب چیقیلیشی کېرهک. عکس حالده قبول قیلینهدیگن هر قندهی قرار فقرالر نینگ محکمه تیزیمی و حقوقي خوفسیزلیککه بۉلگن ایشانچیگه سلبي تأثیر کۉرسهتیشی ممکن.
محمد نبی خلیلي طالبان رهبریتیدن، اوشبو گروه عالي محکمه سیدن، دیني علمالردن، حقوقشناسلردن، قبیله آقسقاللریدن و برچه مسوول ادارهلردن مذکور ایشنی مستقل، خالص و موجود حجتلر اساسیده قَیته کۉریب چیقیشنی سۉردی، شونده هېچ بیر فقرا نینگ قانوني حقوقی بوزیلمهیدی.
شونینگدېک، او خلق ارا همجمعیت، بیرلشگن ملتلر تشکیلاتی، انسان حقوقلرینی حمایه قیلووچی تشکیلاتلر، بیرلشگن ملتلر تشکیلاتی نینگ مخصوص معروضهچیلری، خلق ارا و مستقل محلي یېتکرمه اوشبو مسألهگه دقّت و خالصلیک بیلن یاندهشیشگه چقیردی.
طالبان نینگ مخصوص محکمهسی امید سبز شهرچهسیدهگی بیر مینگ۵۰۷.۴۹جیریب یېرنی «امیرلیک ملکی» دېب اعلان قیلگن. گروه نینگ عدلیه وزیرلیگی اېسه یقینده شهرچه اهالیسیگه حدودنی ترک اېتیش حقیده بویروق بېرگن.
بی بی سی خبریگه کۉره، طالبان شهرچهدهگی «غلغله» کمپنیسینی هم اېگهللب آلگن و اجارهچیلرگه اېندیلیکده اوی اجارهسینی طالبانگه تۉلهشنی بویورگن.
شونینگدېک، بی بی سی معلوماتیگه کۉره، شهرچه وکیللریدن عبارت هیئت قندهارگه باریب، طالبان رهبریدن اوشبو قرارنی قَیته کۉریب چیقیشنی سۉرهماقچی بۉلگن. هیئت طالبان نینگ قندهاردهگی واليسی و هبت الله آخوندزاده نینگ یقینلریدن بیری بۉلگن ملا شېرین بیلن اوچرهشگن، بیراق حاضرچه طالبان رهبری بیلن اوچرهشه آلمهگن.
«امید سبز» شهرچهسی کابل نینگ غربیده جایلشگن بۉلیب، اونینگ اهالیسی اساسن هزارهلردن عبارت. شهرچه سۉنگگی ییگیرمه ییل دوامیده قوریلگن و اونده۴ مینگدن آرتیق عایله استقامت قیلهیاتگنی ایتیلماقده.
