رویترز خبرگزارلیگی اوچ منبعگه تهیهنیب خبر بېریشیچه، ایران و عمان اۉرتهسیده تکلیف اېتیلگن کېلیشووگه کۉره، هرمز بۉغازی آرقهلی حرکتلنهدیگن کېمهلر اوستیدن نظارت تهرانگه بېریلیشی ممکن.
بیر نفر اېرانلیک منبع و ایکّی نفر منطقوي رسمي اوشبو کېلیشوو متنی حقیده رویترز بیلن صحبتلشگن.
رویترزنینگ یازیشیچه، هرمز بۉغازی نظارتی نینگ ایرانگه تاپشیریلیشی حاضرگچه تهرانگه بېریلگن اېنگ ییریک امتیازلردن بیری حسابلنهدی.
امریکا حاضرچه بو تکلیف یوزهسیدن ایضاح بېرمهگن.
اوّلراق امریکا جمهور رییسی دونالد ترامپ هرمز بۉغازینی قَیته آچیش بۉییچه کېلیشوو یقینلشهیاتگنینی معلوم قیلگن اېدی.
امریکا رسميلری اېسه بیر نېچه بار دنیا نینگ اېنگ مهم انرژی سودا یۉلی اوستیدن ایران نظارت اۉرنهتیشیگه هېچ قچان راضی بۉلمسلیکلرینی تأکیدلهگن.
رویترزنینگ یازیشیچه، اگر کېلیشوو ایرانگه بۉغاز آرقهلی کېمهلر حرکتینی باشقریش صلاحیتینی بېرسه، بو امریکا و اسرایل فبروری آییده باشلهگن اوروش منطقهدهگی کوچلر موازنتینی تهران فایدهسیگه سېزیلرلی درجهده اۉزگرتیرگنینی انگلهتهدی. اوروشدن آلدین بۉغاز برچه کېمهلر اوچون هېچ قندهی تۉلاوسیز اېرکین آچیق اېدی.
ایران تشقی ایشلر وزیرلیگی عمان بیلن مذاکرهلرده «سېزیلرلی یوتوق» قید اېتیلگنینی بیلدیریب، فارس کۉرفزیگه کیرووچی همده اوندن چیقووچی کېمهلر ایران حدودي سوولری آرقهلی حرکتلنیشینی معلوم قیلگن.
هرمز بۉغازینینگ شمالي و جَنوبي دېنگیز یۉلکلری ایران همده عمان قیرغاقلری بۉیلب جایلشگن.
ایران نینگ منطقه دولتلریگه آگاهلنتیریشی
رویترز منبعلریگه کۉره، ایران فارس کۉرفزی دولتلرینی امریکا نینگ احتمالي ینگی هجوملری عاقبتلری حقیده آگاهلنتیرگن.
بېش منبع نینگ ایتیشیچه، تهران امریکا ایران حدودیگه ینه ضربه بېرسه، بوتون منطقهدهگی مهم انرژی آستقورمه لری نشانگه آلینیشی حقیده آگاهلنتیرگن.
فارس کۉرفزی دولتلریدن بیر منبع شوندهی دېگن: «اېران نینگ آگاهلنتیریشی انیق اېدی: اگر امریکا ایران اینفرهتوزیلمسیگه ضربه بېرسه، اولر فارس کۉرفزیدهگی انرژی تاسیساتلری و منطقهدهگی باشقه نشانلرگه هجوم بیلن جواب قَیترهدی.»
ایران اوّل هم راکت و درونلر یاردمیده واشنگتن نینگ منطقهدهگی اتفاقچیلریگه ضربهلر بېرگن. تهران بو هجوملر امریکا نینگ اۉبژېکتلری و حربي بازهلریگه قرهتیلگنینی تأکیدلب کېلهدی.
دونالد ترامپ اېسه در لاسوگاس طرفدارلری آلدیده سۉزلهگن نطقیده دیپلوماتیک یۉلنی افضل کۉریشینی بیلدیرگن.
او شوندهی دېگن: «مېن کېلیشووگه اېریشیشنی افضل کۉرهمن، چونکه آدملرنی اۉلدیریشنی ایستهمهیمن. مېن آدملرنی اۉلدیریشنی ایستهمهیمن، اما بیر نقطهده بونگه مجبور بۉلهمیز.»
