آلماندهگی محکمه افغانستان فقراسینی مونیخ شهریده موترنی آدملر اوستیگه هَیدهب، ایکّی یاشلی قیزهلاق و اونینگ آنهسی نینگ اۉلیمیگه همده اۉنلب کیشیلرنینگ جراحتلنیشیگه سبب بۉلگن هجوم اوچون عمرباد قماق جزاسیگه حکم قیلدی.
فرانسه خبرگزارلیگی خبریگه کۉره، مونیخ محکمهسی پنجشنبه کونی (15 اسد) «فرهاد ن.» نامی بیلن تنیشتیریلگن عیبلنووچینی ایکّی قاتللیک، 23 ته قاتللیککه سوءِقصد و 22 ته تن جراحتی یېتکزیش جنایتیده عیبدار دېب تاپدی.
محکمه شونینگدېک، اوشبو ایش «اۉته آغیر جنایت» طایفهسیگه کیریشینی اعلان قیلدی. بو قرار 25 یاشلی فرهاد نینگ کېلهجکده مدتیدن آلدین آزاد اېتیلیش احتمالینی کېسکین کمهیتیرهدی.
مذکور هجوم اۉتگن ییل فبروری آییده آلماننینگ مونیخ شهریده اۉتکزیلگن عامهوي ییغین وقتیده صادر بۉلگن. عاقبتده 37 یاشلی آنه و اونینگ ایکّی یاشلی قیزی هلاک بۉلگن، ینه کۉپلب آدملر جراحت آلگن.
محکمه حجتلریگه کۉره، هجوم صادر بۉلگن پیتده 24 یاشده بۉلگن فرهاد ن. مینیکوپر روسومیدهگی موترنی قریب بیرمینگ 400 کیشی اشتراک اېتهیاتگن کسبه اویوشمهسی نمایشی تامان هَیدهگن.
هجوم عاقبتیده 37 یاشلی عیال و اونینگ ایکّی یاشلی قیزی قریب 10 متر بلندلیککه اولاقتیریلگن. اولر باش قِسمیدن آلگن آغیر جراحتلر طفیلی بیر نېچه کوندن سۉنگ وفات اېتگن.
محکمه جریانیده دادستان کېلتیرگن گواهلردن بیری آدملر «باولینگ کاپتاکلری سینگری اۉنگ و چپ تامانگه اوچیب کېتهیاتگنینی» ایتگن.
عیبلاو خلاصهسیگه کۉره، موتر تخمیناً 23 متر یورگهچ تۉختهگن. بونگه آلد و آستیده ییقیلیب قالگن آدملر سببلی آلد غیلدیرهکلر نینگ یېر بیلن علاقهسی اوزیلگنی سبب بۉلگن.
دادستانلر محکمهده فرهاد ن. هجومنی «دیني» بیلن عملگه آشیرگنی و آدملرنی باسیب کېتگنیدن سۉنگ «الله و اکبر» دېگنینی بیلدیرگن.
بیراق محکمه اۉرگانلری اونینگ هېچ قندهی اویوشگن جهادچی گروه، جملهدن «اسلامي دولت» (داعش) اعضاسی بۉلمهگنینی تأکیدلهدی.
حمایه وکیل مدافعلری اونی روحي کسللیکلر شفاخانهسیگه یوباریشنی سۉرهگن، بیراق محکمه تعیینلهگن اېکسپېرتلر اونینگ روحي معمالری جنایي جوابگرلیگینی کمهیتیرهدیگن درجهده اېمس، دېگن خلاصهگه کېلگن.
فرهاد ن. 2016 ییلده، 15 یاشیده، وایهگه یېتمهگن و همراه سیز حالده آلمانگه کیرگن. اونینگ باشپناه سۉراوی رد اېتیلگن بۉلسه-ده، مملکتده قالیش و ایشلشگه رخصت بېریلگن.
پولیس معلوماتیگه کۉره، او خوفسیزلیک ساحهسیده ایشلهگن همده بادی بیلدینگ و فیتنېس بیلن جدّي شغللنگن.
رسميلرنینگ فکریچه، هجومدن آلدینگی آیلرده او اینترنت آرقهلی اَیریم افغان رادیکال وایزلری نینگ چیقیشلرینی منتظم کوزهتیب، اېکسترېمیستیک قرهشلر تأثیریگه توشگن.
مذکور هجوم 2025 ییل فبرورییدهگی آلمان فدرال سیلاولریدن بیر نېچه کون آلدین صادر بۉلگن. اۉشه سیلاوده «جرمنيه اوچون مقابل» حزبی 20 فایزدن آرتیق آواز آلیب، اۉز تاریخیدهگی اېنگ یخشی نتیجهنی قید اېتگن.
شونگه قرهمهی، اۉشندن بویان کانسرواتیف بلاک نینگ عامهباپلیگی پهسهییب بارماقده، افد اېسه جماعتچیلیک فکری سۉراولریده منتظم روشده بیرینچی اۉریننی اېگهللب کېلماقده.
