افغانستان خبرچیلر مرکزی طالبلرنینگ استخباراتی خدمتی بدخشانده طلوع نیوز تلویزیونینینگ محلي خبرچیسی ناظم قاسمينی حبسگه آلگنینی معلوم قیلدی.
مرکزگه بدخشاندهگی خبردار منبع بېرگن معلوماتگه کۉره، ناظم قاسمي چهارشنبه کونی (۱۴ اسد) کېچکی ساعت تخمیناً ۹:۰۰ ده فیض آباد شهریدهگی اوییدن آلیب کېتیلگن.
طالبلرنینگ بدخشاندهگی محلي رسميلری ژورنالیست نینگ حبسگه آلینیشی سببلری حقیده حاضرچه هېچ قندهی ایضاح بېرمهگن.
منبع نینگ افغانستان خبرچیلر مرکزیگه ایتیشیچه، قاسمي یقینده فیس بوک صحیفهسیده اعلان قیلگن تنقیدي پُستی سببلی حبسگه آلینگن بۉلیشی ممکن. او مذکور پُستده طالبلر کوچلرینینگ بدخشان اهالیسی بیلن معاملهسینی تنقید قیلگن اېدی.
افغانستان خبرچیلر مرکزی طالبلر استخباراتی تامانیدن ناظم قاسمي نینگ حبسگه آلینیشینی قارهلب، اوندن ژورنالیستنی امکان قدَر تېزراق آزاد قیلیشنی طلب قیلدی.
مرکز معلوماتیگه کۉره، حاضرده کمیده تۉرت نفر ژورنالیست و یېتکرمه خادیمی طالبان قماقخانهلریده سقلنماقده.
اولردن بیری اطلاعات روز گزېتهسی نینگ مخبری حمید فرهادي بۉلیب، او 2024 ییل سپتامبر آییده کابلده حبسگه آلینگن. طالبان محکمه سی اونی اطلاعات روز بیلن همکارلیک قیلگنلیک عیبی بیلن ایکّی ییل مدتگه آزادلیکدن محروم قیلگن.
