شانگهای همکارلیک تشکیلاتی دولت رهبرلری کېنگشی‌نینگ قیرغیزستان پایتختی بیشکېک شهریده بۉلیب اۉتگن ییغیلیشی یکونلنگنیدن سۉنگ، تشکیلاتگه رئیسلیک قیرغیزستان‌دن پاکستان‌گه اۉتدی.
بوگون (سه‌شنبه، ۱۰-سنبله) اعلان قیلینگن تشکیلات دولت رهبرلری ییغینی‌نینگ یکوني بیاناتیده ایتیلیشیچه، نوبتده‌گی ییغین ۲۰۲۷ییلده پاکستان‌ده اۉتکزیله‌دی.
اولر قیرغیزستان نینگ۲۰۲۵–۲۰۲۶-ییللرده شانگهای همکارلیک تشکیلاتیگه رئیسلیک قیلگنینی یوقاری بهالب، «شانگهای همکارلیک تشکیلاتی نینگ۲۵ ییللیگی: تینچلیک، ترقیات و برقرار فراوانلیک اوچون بیرگه‌لیکده» شعاری آستیده باشلنگن اوشبو رئیسلیک تشکیلات نفوذی، صلاحیتینی مستحکملش و برچه یۉنلیشلرده عملي همکارلیکنی کېنگه‌یتیریشگه کتّه حصه قۉشگنینی تأکیدله‌گن.
شانگهای همکارلیک تشکیلاتیگه اعضا دولتلر رهبرلری، بوندن تشقری، تشکیلاتگه ۲۰۲۶–۲۰۲۷-ییللر اوچون رئیسلیکنی پاکستان‌گه تاپشیریش بیلن بیرگه، پاکستان‌نینگ لاهور شهرینی هم اوشبو ایکّی ییل دوامیده «شانگهای همکارلیک تشکیلاتی‌نینگ مدني پایتختی» دېب اعلان قیلگن.
پاکستان افغانستان بیلن بیر وقتده،۲۰۰۵-ییلده شانگهای همکارلیک تشکیلاتیگه کوزه‌تووچی اعضا بۉلگن. بیراق بو مملکت ۲۰۱۷ییلده تشکیلاتگه تۉله‌قانلی اعضا بۉلدی و حاضر اونگه رئیسلیک قیلماقده. عینِ پیتده افغانستان نینگ تشکیلاتده‌گی رۉلی سوسه‌یگن و طالبلر مملکت اوستیدن قَیته نظارت اۉرنه‌تگنیدن سۉنگ، افغانستان‌دن بیرارته نماینده هم اوشبو تشکیلات ییغینلریده اشتراک اېتمه‌یپتی.
