«دویچهوله» خبریگه کۉره، آلمان ایچکی ایشلر وزیرلیگی بوگون (سهشنبه، ۱۰-سنبله) اوشبو شخصلر دېپورت قیلینگنینی معلوم قیلگن و اولر چارتر طیاره بیلن افغانستان پایتختیگه آلیب باریلگنینی بیلدیرگن.
ایچکی ایشلر وزیرلیگی سۉزلاوچیسینینگ ایتیشیچه، دېپورت قیلینگن شخصلر آلمانده قاتللیک، قصداً آدم اۉلدیریشگه اورینیش، اۉغریلیک، حرفهای درجهدهگی اۉغریلیک، کوچ ایشلهتیب تاولمچیلیک، آغیر تن جراحتی یېتکزیش و قصداً یانغین چیقریش کبی جنایتلرنی صادر اېتگن.
آلمان شو پیتگچه بیر نېچه چارتر آرقهلی جنایت صادر اېتگن باشپناه ایزلاوچیلرنی افغانستانگه دېپورت قیلگن.
سۉنگگی دېپورت پروازی هم بیر هفته آلدین عملگه آشیریلگن اېدی.
آلمان شو پیتگچه اساسن جنایت صادر اېتگن۲۵۰ نفر افغانستان وطنداشی مملکتیگه دېپورت قیلگن.
آلمان فدرال ایچکی ایشلر وزیرلیگی جون آیینینگ اۉرتهلریده جنایت صادر اېتگن افغانستان وطنداشلرینی اۉز مملکتیگه دېپورت قیلیشنی کېنگهیتیریش نیتیده اېکنینی معلوم قیلگن اېدی. طالبان مأموریتی دېپورتنی عملگه آشیریشده آلمان حکومتی بیلن همکارلیک قیلهیاتگنی ایتیلماقده.
آلمان حکومتی دایما طالبان بیلن علاقهلر «تخنیکي درجهده» اېکنینی و طالبان مأموریتینی افغانستان حکومتی صفتیده تن آلمهسلیگینی تأکیدلب کېلهدی.
دېپورتلرنی کېنگهیتیریش آلماندهگی مسحی و سوسیال-دموکرات حزبلر اتلافی حکومتی تامانیدن اعلان قیلینگن مقصدلردن بیریدیر.
